「39+1」係咪真係咁可怕？唔少女士面對呢組年齡數字都會封口避談。但對即將踏入四字頭嘅楊思琦而言，卻係一個值得紀念嘅日子，所以佢決定喺今年推出首本個人寫真集《Miss Szeki 2018》，希望趁輕熟之齡為自己留下一點回憶。
思琦早前赴馬來西亞五日四夜取景拍攝，換上近20套靚衫，當中不乏小背心、泳衣、睡衣等性感造型。思琦係01年嘅港姐冠軍，由初選到現在已為人母，34D、24、34勻稱身材依然keep得咁好，令人羨慕。思琦接受《蘋果》訪問時話：「其實以前都想出一本寫真，邊個唔鍾意靚相，想趁青春留倩影。但以前經理人係tvb，比較少機會（出寫真），咁啱之前有出版社搵我，咁就一拍即合。」
思琦話拍攝過程都幾辛苦，因為要由朝曬到晚，佢笑言吸收咗好多維他命D，佢強調今次唔係賣弄性感，而係美感，所以連囡囡卓穎睇都ok，佢話：「媽咪平時同佢游水着泳衣都係咁，都係sell 健康性感，靚行先，平時得一號笑容，現在畀攝影發掘咗唔同角度嘅笑，原來都幾靚。」
問到有冇諗過賣幾多本？佢話：「主要係想完成一樣自己想做嘅嘢，寫真入面除咗靚相，仲有用文字分享自己唔同階段嘅成長，仲有一啲鮮為人知嘅事透露，而賣到幾多，扣除成本後都會捐去慈善機構，對我嚟講已經係一舉兩得。」
(蘋果日報)
