陳淑蘭之前喺fb以「引狼入室」發文，引發佢同女性友人Crystal展開網上罵戰，今日蘭子喺報刊嘅專欄作出文字版本嘅回應外，亦恢復返港台主持節目《開心日報》。節目後蘭子接受記者訪問，再度為事件解畫。
事件涉及到利承武，在場記者就問到蘭子目前與利生嘅關係，蘭子即煞有介事咁答：「我覺得呢個係額外嘅嘢，我唔會講嘅，額外嘅，哈哈哈…(你係想保護番佢嘅形象，所以唔肯講？)你講邊個呀？(利生囉！)我不嬲都冇講佢嘅嘢，咁就唔使保護啦！我諗唔係保唔保護，只要有啲人唔立亂咁誹謗，已經好足夠啦，不過件事入面都有少少誹謗嘅嘢啦，所以唔適合講咁多囉，交俾一啲專業嘅人事去處理。」
對於有傳聞蘭子已經同利承武分手，蘭子就話：「我同每一個人一齊都俾人傳㗎啦，係咪先，應該我呢個年紀應該抱孫㗎喇，如果係咁傳嘅話，所以我覺得喺呢一行咁耐，咪得啖笑囉，亦唔需要認真地回應囉！」記者追問二人感情是否穩定同一直冇變，蘭子兩條問題都係以「多謝關心，哈哈哈…」嚟作回應。
而蘭子亦話件事亦冇影響到佢嘅心情，至於Crystal喺社交平台寫嘅嘢都係全部不實，蘭子話：「我諗我唔再去回應呢樣嘢，再唔去延續喇，因為之後你哋又會再搵佢回應，跟住我覺得怨怨相報何時了呢，係咪先，我諗夠喇，完結喇！同埋有啲嘢牽涉到第三者，第三者嘅嘢可能係xxxx嘅嘢，為咗表示邊個啱，邊個唔啱，又要再摷一啲嘢嘅時候，公司好哋哋時，又要公開講好多嘢，咁樣唔係咁好囉，所以我覺得此事應該喺度作完滿結束㗎喇！」
有記者就提議蘭子不如沖喜吓，蘭子即答：「咪係啦，我會搞大生日呀，你哋嚟唔嚟吖…哈哈哈(有冇諗過正式拉埋天窗？)嘩吓，(都50咯！)50可以做好多嘢，未必要拉天窗，我o依家讀書先啦，我o依家每個月都去中國讀書，學到好多嘢，佢都講後啱嘅，我就應該要進修吓自己，提昇吓自己，咁我多謝佢嘅提點啦，對於人嚟講呢，人就係要活到老學到老，對於我嚟講就要學到死，因為我嘅資質比較低，所以個人好開心，諗嘅嘢係唔同咗囉。」
Crystal就建議蘭子讀有關品格嘅科目，蘭子聽到之後就話：「如果有需要我都會去讀㗎，咁就大家互勉之啦！我o依家就讀文化創意，因為我自己本身投資咗公關公司，咁就覺得自己好多嘢唔識，例如電競係乜我都唔知，但o依家電競好犀利，所以至少我覺得都要去睇吓乜嘢叫電競，咁唔係學咩人做公關呢。」最後蘭子好坦白咁話感情嘢唔諗喇，始終係到就係到，唔係到諗都冇用，所以私人嘢就唔講啦，搞掂自己啲品格先啦。佢亦提到之前自己有社交死懼，都休息咗好耐，喺舒適圈度，點知一踏出舒適圈，就真係唔舒適喇！
(蘋果日報)
