【劇集慶功屋企準備添新成員】劉德華好風騷:我會努力向上

    劉德華監製、導演黃國強、吳鎮宇、張孝全、蔡潔主演,由美國福斯傳媒集團投資拍攝嘅廣東話原創劇集《東方華爾街》,今日喺尖沙嘴一酒店舉行慶功。


    華仔剛獲邀出任美國奧斯卡金像獎委員,真係恭喜哂!同時現年52歲嘅劉太朱麗倩,早前出席公開場合時腹大便便疑似有孕,亦喺大家關心嘅目標,華仔接受訪問時已經否認太太有喜:「其實我喺fan club已經話冇,不過『我會努力向上』,希望添新成員㗎,唔會話唔想,順其自然。」


    華仔透露呢套劇集就會開第二輯,自己會繼續做監製,未唔知會唔會客串角色,或者第三季先客串,佢話:「唔使主角,重要就得嘞。13集左右,集數少可以budget大啲,希望今年可以開到。拍方面由導演負責,自己當長片咁拍,嚟緊形式好似真正劇集,新加演員未知,原班人馬就一定。」華仔透露目前拍緊電影《掃毒2》,一星期開工4日,華仔好風騷咁話:「你唔覺得我靚仔返咩?」


    華仔獲委任做奧斯卡評委,有機會選出明年得獎名單,不過工作仲未開始,佢都話要先暸解下或者請教下前人要點做,佢話:「好開心可以做到評審睇到唔同製作同片種,應該夠時間睇晒啲片,唔睇晒唔可以投票,呢個係gentlemen game你可以話自己睇晒都得,不過我唔會咁做。」

    (蘋果日報)

    SHARE