【當個仔係提款卡?】黃秋生:佢依家唔俾個仔返屋企

今年56歲嘅黃秋生,同太太吳惠貞結婚26年,婚後二人育有兩子睿名及煜政,然而本周四《蘋果》卻收到一名自稱Joyce的讀者報料,稱已婚26載的秋生,有一個20歲的私生子,秋生回覆本報時亦直認不諱,承認William係佢嘅私生子。而William嘅生母就係Joyce,今日有周刊報道指Joyce事隔廿年先向爆料,其實係為咗一個字「錢」,報道指過去多年Joyce都當William係提款卡。

報道指,Joyce是岑建勳嘅姨甥女,Joyce喺17歲嗰年同已婚嘅秋生拍拖,話佢哋嘅關係維持咗十年,當時Joyce英國、香港兩邊走,到William兩歲嘅時候就同囝囝返咗英國定居,報道指多年來秋生都有做父親嘅責任,仲喺英國買屋安頓佢哋兩母子。然而過咗廿年,Joyce先至公開數臭秋生,報道就指因為多年嚟Joyce當囝囝係提款咭,不時要秋生加碼俾錢,如果唔配合就會攞William嚟出氣。有指秋生以往亦會接到囝囝嘅爆喊電話,秋生唔想難為阿仔,就唯有就範。

廣告

今年20歲嘅William,準備升讀大學,秋生覺得William都大個仔,所以就將生活費直接過俾佢,引起Joyce嘅不滿,所以就將事件公開。有指Joyce同秋生分手後,已經結過兩次婚,同o依家嘅老公亦有一對仔女,秋生接受另一本周刊訪問時就不願多談,而佢亦好坦白咁話自己亦再冇其他秋生仔女,報道入面仲有知情人士話,秋生同Joyce有私生子嘅事,都已經困擾咗佢好多年,所以今次事件公開咗,對佢嚟講都係一種解脫。

知情人士亦證實Joyce真係已經結咗婚,亦有仔有女,秋生同佢亦再冇聯絡。今日《蘋果》聯絡過秋生,對於私生子被公開係為「錢」一字,與及Joyce已再婚,佢話:「咪好囉,終於有個了結。佢一早就應該將D心血放番喺自己家庭啦。不過佢o依家又唔俾個仔返屋企,我o依家又擔心緊個仔入大學前住喺邊。呢樣唔得又嗰樣。」

(蘋果日報)