黎天王黎明（Leon）今年3月被爆同唱片公司女助手Wing Chan撻着，Wing仲為佢陀B女，「黎天王」搖身一變成為「黎父王」。消息曝光後，Leon曾於3月19日現身灣仔出席電影節活動，但佢當日未有接受傳媒訪問，只在活動後，透過facebook宣布喜訊，以「兩個經歷過離婚的人，有機會走在一起已是一種緣份」開首，承認展開了一段新感情，以及快將當爸爸，之後就一直未有再公開露面。
黎明喺3月19日出席電影節活動後，未有現身公開活動。（網上圖片）
唔駛急！「神隱」100日嘅Leon，終於復工喇！今個星期四（7月5日）佢會現身荃灣，出席早前為「終身年金」拍宣傳片嘅活動記者會，粉絲們想親口向Leon送祝福，終於有機會喇！
據知，過去3個幾月，除咗預先安排好嘅工作，Leon將其他工作全部叫停，希望爭取多啲時間陪伴初生女兒，事關初為人父嘅Leon，對女兒所有事都相當緊張，B女出生後，Leon亦喺facebook撰文，感激醫護人員之餘，同時以「漢奸」形容爆料者，表明不會再現身醫院，選擇喺私人空間陪伴家人。
(apple daily)
