【馬國明都好擔心】高海寧自爆有後遺症:容易鬥雞眼,又有重影

藝人馬國明及高海寧(高Ling)為劇集拍攝,日前以「夫妻檔」到南生圍拍攝影婚紗照場口,馬國明於33度烈日當空下仍身穿禮服拍攝,全程面不改容,笑言為拍攝都要頂硬上!

身穿入膊露香肩喱士婚紗的高Ling亦非常專業,事關她是帶傷上陣,受訪時她自爆之前拍攝個人戲份時受傷,撞親後腦兼盤骨位瘀晒:「當時係喺街市拍緊,咁有塊滑板,上面就有兩個菜籮,自己兩隻腳都企咗入去,一拉條繩向前行就失平衡撻落地。(有即刻去睇醫生?)有呀,有即刻Call白車,跌低咗都要抖一抖先起到身,入院之後就有照腦掃描、X光,睇吓有冇事,好彩都OK冇事,即刻返到工。」

廣告

廣告
高Ling坦白交代病情

問到後腦撞傷位置已消腫?她表示需時康復,不過就再爆產生後遺症:「會再複診照磁力共震嘅,主要係對眼依家望嘢容易鬥雞,向右望又會有重影,醫生話可能係撞擊影響到入面啲神經線,眼肌依家就唔係好控制到,慢慢會好番。」不過她在劇中飾演特工,打鬥戲份少不免,問到之後會否錫身拍攝?她就解釋今次只是意外,希望之後都可以親自落場,拒絕用替身。高Ling又慘爆話受傷後原想打畀媽媽報憂,不過反被「驚喜」:「細佬早前去咗日本旅行,我喺白車打唔到畀媽咪,原來佢同爸爸臨時買機票飛去日本搵細佬,受咗傷都冇人陪,好失落!」

高Ling都趁空檔抖一抖。

身旁的馬國明無奈指當時自己不在場,對方受傷後才抵達、緣慳一面:「臨去到先收到消息,都好擔心,有上十字車睇一睇佢,問佢有冇事,其實都有叫佢休息多日嘅,但佢話冇所謂、繼續拍攝,好專業!」之後拍攝會否「錫」住高Ling?他即謂當然會,又為對方大呻辛苦:「佢嘅戲份有九成咁滯,仲有好多打戲。(咁你自己都有打戲?)後段先有多啲。(都會錫身?唔怕女友黃心穎擔心?)都唔驚,之前拍過好多,今次啲打戲都係輕鬆、搞笑為主,都唔會有太大挑戰。」

 

(on.cc)