【王子首回應戀情!】鄧麗欣刻意分開Check in扮唔識

34歲鄧麗欣(Stephy)最近傳出同細自己5歲嘅前台灣偶像組合Lollipop成員邱勝翊(王子)拍拖,二人日前被報道指早喺4月時就一齊去咗泰國蘇梅島度假,不過當事人就否認戀情,強調只係好友關係。

不過今日又有報道話,呢對姊弟戀緋聞人物,喺上個月27號坐同一班機由香港到台灣,身邊無工作人員,好大可能係私人行程。睇嚟都發展得好快,唔知係咪去見家長呢?王子所屬華研回覆《台灣蘋果日報》就話:「是為演藝工作以外的其他合作。」報道仲話,跟據目擊者爆料,指佢哋係坐早機,當時身邊都無助手,但就刻意分開Check in扮唔識,咁煞有介事,反而仲令人起疑心。而同日,Stephy就喺社交網貼相,話自己「冇瞓覺發吽逗」,留tag講早晨,同報道指佢搭早機不謀而合,但Stephy又另外留多兩個tag「世界杯」同「應該好多人都無覺好訓」,唔知係咪想轉變視線。

廣告

廣告
同日Stephy話自己冇瞓覺,發吽逗。(ig圖片)

其實今年5月頭王子嚟香港九展開演唱會時,Stephy同應采兒就一齊去捧場,據聞Stephy就係透過應采兒喺今年2月時認識王子嘅!

今年5月王子喺香港開巡唱,Stephy同應采兒去咗睇騷,有指應采兒係二人媒人。(資料圖片:蘋果日報)

至於未來有無發展嘅可能?王子就輕描淡寫話:「隨緣。」無一口就封死自己後路,王子之前都同楊丞琳發展過姊弟戀,睇嚟佢都係鍾意「姊姊」喎!

 

(apple daily)