還有半個月踏入49歲嘅陳淑蘭，最近跟圈外好友Crystal公開反目，Crystal踢爆蘭子與利希慎家族成員利承武已分手！日前蘭子在電台受訪，揚言以後會帶眼識人，但拒回應是否已分手；然而，昨晚蘭子跟7位好姊妹預祝生日，收到一個寫住「BLESSED WIFE」生日蛋糕，引發蘭子秘婚疑雲，疑似宣示人妻身份！
當日蘭子在電台透露，獲高人指點今年生日要大搞，預計要60人，笑言：「我一向得罪人多稱呼人少，60人好驚囉，600個仇人就容易啫！」呢個盛大生日派對訂於19號正日舉行，昨晚踏入生日月，蘭子率先同7位圈外閨密預祝，並在社交網貼合照和生日蛋糕相，留言：「多謝親愛的姊妹們為我的生日月揭幕，被你們愛着，蒙福像個寶！」鄧達智、黎瑞恩、傅明憲、李蕙敏都留言祝福，鍾淑慧更寫道：「我心中永遠活潑可愛美麗動人的蘭子，祝你事事順心順意，身體健康，繼續美麗動人，幸福快樂哦?? happy birthday」
不過，幾位好姊妹送比蘭子嘅蛋糕，竟寫着：「HAPPY BIRTHBAY SHEILA BLESSED WIFE LOVE」唔通蘭子被生日蛋糕出賣已為人妻嘅秘密？記者致電向蘭子求證，佢表示：「唔係喎，噚日朋友幫我整咗蛋糕，BLESSED WIFE？啊，因為嗰班係查經班姐妹，其實我噚日都未有時間睇到蛋糕寫乜嘢，BLESSED WIFE係咪即係上帝嘅新娘呀？我要多謝班姐妹先。」
轉頭蘭子再回覆，大笑說：「仲好笑，原來唔係上帝嘅妻子，啱啱問咗幫我造蛋糕嘅朋友，原來佢係寫…哈哈哈…BLESSED WITH LOVE，可能啲人串錯字，BLESSES WIFE，哈哈，真係好笑，我因為老花呢，睇唔到啲字寫乜嘢。」問到係咪冇秘婚？蘭子哈哈笑說：「邊有秘密瞞得到你哋，梗係冇秘啦，便秘就有！」蘭子話7月係生日月，朋友提早幫佢慶祝：「朋友幫我陸續搞慶我嘅人生，等我下半生吉祥啲。」
(apple daily)
