上月30日剖腹誕下囝囝的葉翠翠，今日由老公與大仔接出院，一家四口溫馨合照，老公更輕吻翠翠。
翠翠身穿露肩裙與四吋高跟鞋示人，精神奕奕，她稱BB足月出世，有九磅重，她也意想不到：「bb一出世，醫生抱住佢就話BB實有七磅幾，點知攞去磅係九磅。今次生仔冇上次咁驚，我上次都係開刀生，雖然局部麻醉，但都好痛，今次我同醫生反映咗，佢畀啲氣我聞，成個過程冇痛，好舒服。」問到名字？翠翠表示仍未為BB改名，她笑言：「英文名，我老公都諗咗幾個月，尋晚佢話不如叫Titus，我上網睇，原來係牌子名，所以打消咗個念頭，我諗佢要花多幾個月去諗。中英文名都係老公改，我諗乜都冇用，佢唔會批准，應該會夾吓八字去改名，但都係交畀老公負責。」
至於會否再追女？翠翠即時耍手擰頭：「唔會，兩個已經攞命，今次佗得好攰，又要照顧大仔，但我又抱唔到佢，個心都好唔舒服，兩個都夠。其實我係鍾意女，但依家社會好危險，生女好多嘢要擔心。」她揚言要封肚，沒有計劃生第三胎，意外都要避免：「老公有話生個女，但如果再生都唔係女咁點，再生仔真係連屋都拆埋呀！」
翠翠指BB大食，會餵人奶之餘，也要補奶粉：「補奶粉都要三安士，我諗我要努力，但我唔主張畀太大壓力自己，只要唔好餓到BB，我唔介意補奶粉。」見她已着高跟鞋，她自認貪靚：「我今次佗b好緊張，因為我經常Facebook教人長胎同點保持狀態，我要做個人版畀佢哋睇，生完唔可以好憔悴，要畀人知保健同保養好重要。」期間她以紙巾抹眼，她澄清：「我唔係感動，係有嘢吹入眼啫！」
（on.cc）
