【懷孕近六個月】加埋呢樣就三喜臨門恭喜哂~

    31歲嘅落選港姐李美慧,雖然喺《宮心計2深宮計》飾演宮女,但現實生活就係豪門少奶,佢上月嫁畀富商曾文豪,兩人喺淺水灣酒店簽紙行禮,曾文豪仲有兒孫到賀,三代同堂,噚日佢哋又再係法國搞咗一個結婚Party,見到陀B近6個月嘅李美慧,分別着咗花花同綠色嘅長裙,身型仍然好Fit、好瘦。

    曾文豪真係錫到老婆李美慧燶,婚後就帶老婆去咗法國度蜜月,噚日又喺法國搞結婚party,同時為曾文豪慶祝57歲生日,仲有奶奶都生日,三喜臨門。

    李美慧就係ig度貼圖,同大家分享佢哋嘅喜悅,佢留言話:「Happy Birthday,老公大人,希望你開心每一日!工作順心如意,愛你」,相中曾文豪着住白色西裝,李美慧則穿花花裙,佢哋喺戶外搞P,露天草坪,風和日麗,李美慧當然忍唔住同老公咀嘴放閃。

    之後李美慧再換上綠色deep v長裙,期間仲扮埋DJ,作狀打碟,呢位人妻同準媽媽都幾搞笑喎,難怪O氹得老公曾文豪笑得咁開心啦!

    而今次結婚派對以鮮花做主題,充滿浪漫氣氛,旁邊還有糖果桌,放滿粉紅色糖果美點,十分吸引。李美慧心情大靚,仲拍片介紹。

    另外,李美慧仲貼咗送俾老公嘅生日禮物出嚟,原來係一本佢哋嘅結婚紀念冊,同一張廿蚊紙幣,睇落好似好孤寒,但其實係心意搭夠,因為張廿蚊紙幣嘅編號係老公嘅生日日期,相信曾文豪收到都一定冧爆!

    (蘋果日報)

    SHARE