自今年4月，唱片公司女助手Wing Chan為黎明誕下小公主後，榮升爸爸的Leon即時消失於公開場合，而一直忙於湊女的他今日終於出山，下午以年金宣傳大使身份到荃灣荃新天地出席香港年金計劃啟動禮，除此之外，Leon更為是次計劃唱主題曲《下半場》。由於今次係Leon做爸爸後首次露面，好多fans亦有帶同舉寫住「黎明」的牌到場支持，人數亦足足多至企滿兩層商場，而當見到Leon出現時，亦有不停大叫Leon。
正所謂人逢喜事精神爽，Leon今日以西裝恤衫牛仔褲、一幅smart casual look打扮現身，特別醒目有型。不過唔知係咪湊B辛苦，見Leon明顯比之前瘦咗少少，雖然在活動逗留了短短30分鐘左右，但他明顯心情勁靚，全程笑晒口之餘，亦不時同現場觀眾揮手，勁親民。
活動開始時，大會播出Leon為是次活動拍攝的宣傳短片，片中的Leon以老妝示人，以老人家身份同其他老人家玩遊戲，期間有個叔叔同Leon講話佢似其中一位四大天王，點知即Leon搞笑地反問：「劉德華？」之外叔叔就話「你靚仔啲！」，而貴為金句王的Leon，亦有在片中大晒金句「退休就係使錢的遊戲！」，而同老人家玩遊戲其間，他們也有講出自己心聲，話而家都要幫仔女儲錢，搞到剛剛成為爸爸的Leon，聽完都呆一呆、若有所思咁。
雖然是次活動不設傳媒訪問時間，但活動上Leon亦有與司儀車淑梅閒談，對於要放下天王的英俊瀟灑扮老，Leon就話：「唔關事，係年金公司話呢個計畫只係65歲嘅退休人士先用到，話希望我化老妝，問我有冇問題？如果唔係好難推廣，化個妝似唔似就見人見智，化妝時間耐咗，睇吓需唔需要，有需要的話相信每個演藝人都會化。」之後車淑梅問Leon化老妝是否會擔心自己皮膚敏感？他說：「會呀，而家科技進步啲，以前（塊面）仲紅啲，希望日後科技更加進步。」
問到拍攝短片當日是否跟長者玩得好開心？Leon即大晒金句話：「拍廣告到而家，人生有唔同感覺，人係生命，每個人生命都有唔同過程，小朋友會笑哥哥覺得怪，小朋友又會笑老人家老，而家我會知道小朋友係笑緊我，不過，上天賦予嘅外形唔重要，最重要係思想，思想可以搵到啱嘅知己同朋友，可以做番自己開心又令人開心嘅嘢就足夠。」心情勁靚、而家應該好開心的Leon之後又話：「其實老人家65歲都唔係好老，仲後生過我個（老）妝，人生每個唔同階段都要互相專重，大人專重小朋友、小朋友又專重大人，我係年金公司開會時都講過，其實做人仔女的都可以買畀爸爸媽媽，因為做父母好辛苦儲錢畀仔女供樓上車，但過咗一段時間，其家啲錢係唔夠，呢個計劃就有政府密密支持喇！」
由於大會有幅宣傳相是化老妝的Leon與其他人影的全家幅，車淑梅亦有問Leon望到全家幅有乜感覺？點知Leon話：「好陌生，其實個個都唔識，瞬間就坐埋一齊話影張相，咁就好啦。（車：你鍾唔鍾意影全家幅？）好難，我世界嘅全家幅影像，都係我小時候嘅視覺觀察，因為我自小父母離異，自己眼中，我只係望人哋嘅全家幅，自己就少啲，當然拍戲都會有，我個人呢好講感覺，全家人坐埋一齊，中秋節、20度，坐係磚頭屋入面食嘢，呢個場景已經好溫馨，其實影嗰張（宣傳）相的背後有40個人喺度，所以好難幻想。」
而他隨即又被問是否享受一家人相處？Leon就話：「與其享受，不如自己去尋找同珍惜。」而Leon與車淑梅在閒談完臨落台之際，車淑梅亦有向Leon講恭喜，而Leon爸爸聽到後亦即笑住講多謝。之後，Leon應大會邀請主持啟動及祝酒儀式，完成後Leon準備離開之際，記者即上前叫Leon，而他亦好親切地身傳媒揮手，雖然記者打算趁機問Leon湊女辛唔辛苦？想擺酒先定擺百日宴先？可惜現場環境太嘈關係，Leon在聽唔到問題下匆匆離開。
(蘋果日報)
