【老公突然決定要出家】辭親時落淚:你冇講畀我知

    曾為已故的羅慧娟拍攝生前最後一輯照片、以攝人像出名的香港知名攝影師葉青霖,與藝人廖安麗(Annie)在1986年結婚,婚後人十分恩愛,誕下兩女後移民澳洲至 1999 年回流香港,不過於2010年,兩人突傳出離異消息,因為葉青霖要出行修行。

    香港知名攝影師葉青霖,與藝人廖安麗(Annie)在1986年結婚(影片截圖)

    最近常霖法師在佛教網站的訪談節目中,找來前妻作深情對談,倆人除細訴相識、結婚經過外,更談論自己當日告訴Annie要決心出家後的情形。

    法號為釋常霖的葉青霖主持節目《常霖有請》,更邀請前妻做訪談(影片截圖)
    兩人由認識講到出家,而Annie提到前夫出家後亦忍不住哽咽起來。(影片截圖)

    婚後人十分恩愛,誕下兩女後移民澳洲至 1999 年回流香港(資料圖片)

     

    雖然常霖法師一直想全心向佛,不過一直等到2008年生日當天,他才決心走上修行之路。

    出家前早晚都有打坐習慣的常霖法師,當日早上打坐後,突然想到,生日就於生命又短一年,於是決心向佛,更在吃早餐時告訴太太廖安麗。

    節目中,Annie聽到這位曾是自己丈夫的常霖法師這樣說,即笑謂:「我完全唔會忘記嗰個景象,因為咁啱嗰日又係你生日,估都估唔到你會講個咁嘅話題。好記得當時你問我,你話諗條路係咁行,所以你冇時間再打理公司嘅生意,如果留盤生意畀我一個人打理,我仲做唔做?我諗都唔使諗,梗係唔做啦!因為真係好吃力!」鏡頭前Annie笑容滿臉。

    回想當日老公告訴她的情況,Annie說:「我完全唔會忘記嗰個景象。」(影片截圖)

    於2010年,兩人突傳出離異消息,因為葉青霖要出家修行。(資料圖片)

    Annie又謂,出家前的葉青霖,平日比自己更貪靚,沒想到出家後,要剃光頭及只剩下幾套衣服,他竟也習慣了,不由得大為歎服:「點解你做得到嘅呢?我係深深佩服你。」常霖法師又稱,出家前數年,已陸續將個人收藏,包括相機、衣服等逐步送出:「我當時好開心,我同啲人講,我依家真係死而無憾,因為我冇負累畀人。」Annie接口道:「你講開衣櫃,我以前有時都會幫你執下衣櫃,就發覺,咦,越嚟越少越嚟越少,嘩,掂呀!非常精進!」豎起拇指。

    傾談間,Annie不止一次說,「其實真係唔容易」、「其實真係唔容易」,但她一直十分硬淨,節目中未有流露傷感之情。

    這對曾是最親密的伴侶,憶述當日在台灣進行「辭親」儀式上、Annie突然流淚一事。常霖感嘆:「嗰個位我同你都喊!」Annie就稱根本當時不知道有此環節,故當常霖法師向她下跪時,令她大感愕然:「『辭親』係一個儀式,係向至親嘅人say goodbye,咁……我係唔知嘅,因為你冇講畀我知。」常霖就解釋:「我大約知道嘅,但係我就覺得……OK……因為當時剃度儀式好多環節,佢哋有同我講,我大約就知道到時會有人同我講做乜做乜,所以我只係知道要做乜,但我未投入嗰種感覺。」

    提起常霖法師當日剃頭中的「辭親」儀式,法師感嘆:「嗰個位我同你都喊!」(影片截圖)

    Annie就說:「因為冇心理準備嘅關係,當時嘅感覺係好突然,嗰個位係我從來呢一生人未試過,冇諗過自己嘅老公會跪自己,你跪我,我直情覺得我受唔起,我當時真係咁諗。」表示當日流淚,並非不捨丈夫出家,而是「感動」,常霖補充:「唔係傷痛。」

    兩人在鏡頭前有說有笑,直至Annie講到自己從台灣返港後,搭地鐵時遇上街上人為自己打氣:「我好記得,我好鍾意搭地鐵,試過好多次唔認識嘅人認得我,離遠望到即刻走埋嚟,『Annie!』,然就握住我隻手話『我好支持你㗎,你撐住…』」

    此時,Annie在鏡頭前忍不住拭淚:「我頂唔順添,OK……得嘅,其實當時好開心嘅,因為佢哋真握住你隻手話『支持你,你撐住呀!』我好明白佢哋好關心我,所以我就話冇事嘅、冇事嘅,多謝你關心、多謝你支持,其實我係冇嘢囉。」常霖法師聽到後即說:「都係,因為一個三唔識七嘅人走埋嚟對你鼓勵、支持,你亦知道佢係明白究竟係咩一回事。」

    Annie 亦忍不住咽哽地說:「我好明白佢哋好關心我。」(影片截圖)

    Annie續說:「係呀,唔明㗎,一定唔明㗎,因為佢哋唔係經歷咗我……因為好多人睇報紙先知,佢哋以為我老公突然地走咗去唔理我,佢哋唔會知道1997年嘅時候我已經有心理準備,佢哋係唔會知嘅。」

     

     

    (apple daily)

     

    SHARE