【被孫耀威大鬧低手】馬先生:會再親自道歉

廣告

孫耀威(Eric)前年同友人合作,投資近千萬喺尖沙嘴開設走高檔路線嘅禮服訂製專門店,而今日佢就喺facebook嬲爆貼文寫:「剛剛發現一位所謂藝人來我店借西裝,說是去」CHANNEL」活動,原來只是去馬來西亞參加朋友婚禮!其實你不用講大話啦。告訴我們真實用途就可以了!這樣不是更顯得你的低手嗎?!我送俾你都得啦馬先生!」

雖然Eric全程未有指名道姓誰是「馬先生」,但明顯矛頭直指剛與好友吳千語去馬來西亞,參加當地億萬富商陳志遠大女陳雪玲婚禮嘅馬天佑。Eric貼文後,不少好友都紛紛留言「猜猜馬是誰」,有人講笑話一定唔係馬浚偉,因為佢冇時間去飲,又有人估馬國明,但Eric都否認。

不過,Eric卻堅持唔開名,仲話:「我不在page post已經仁至義盡!不想有新聞!益埋佢!」之後傳媒聯絡Eric了解,問到係咪鬧馬天佑?以後仲會唔會借衫畀佢?Eric表示:「唔回應。」

廣告

而被指講大話借衫嘅馬天佑,回應傳媒時,就自動對號入座,承認自己係Eric口中嘅馬先生。佢解:「我啱啱由馬來西亞返香港,已經即時向同事了解咗,證實咗的確有件咁嘅事。」

馬天佑 (資料圖片)

馬天佑再解釋:「我之前真係唔知道,我喺公司試嘅時候,冇問清楚西裝係如何借返嚟就攞咗出trip。不過點講都好,咁樣做係好唔啱,我喺呢度衷心同Eric道歉,亦都已經同同事講咗,唔可以再有同樣嘅事發生,今次件事真係好對唔住,我會再親自同Eric道歉。」

 

 

(apple daily)

 

廣告