搖身一變視帝女友嘅單文柔（Phoebe），喺2016年選港姐前，其實都係一個靚妹仔，塊面仲有啲脹卜卜，仲梳住個冬菇頭！
到佢參選時，相比其他佳麗，佢已經叫做微胖，不過憑住「鄰家女孩」形象唔只贏得網民歡心，仲成功俘虜埋陳展鵬！
經過選美「洗禮」嘅佢，學識扮靚示人，仲搣甩肥肉，雖然主持過兒童節目《Think Big天地》、《Big Big小明星》等，但始終未能上位，不過喺最新嘅《美女廚房》中，做美女學徒脫胎換骨，晒出長腿相當煞食，令人眼前一亮，少少甜卜卜脆，搞到大家暈佗佗！
雖然廚藝麻麻留唔住展鵬個胃，但使出「鉸剪腳」一樣箍住男友！
佢為人相當低調，除咗選港姐着過比堅尼，「性感」幾乎絕迹，佢喺社交網分享嘅生活照都係「普通貨仔」，貫徹其「鄰家女孩」形象，乖巧又清純！
(on.cc東網)
