上月離開大台嘅岑麗香，今日將軍澳出席一個開幕禮，佢喺台上透露早前放假返咗加拿大探親，又去咗法國拍廣告，大約一個月，香香透露此行忙於出席老公強強細佬同表哥嘅婚禮，又去咗探婆婆，亦去咗法國拍廣告，工作之餘又可以見到屋企人，感覺好完美，好開心可以休息吓。
香香話：「揸車遊咗半個加拿大，亦都拍咗廣告。（強強有冇陪你去法國？）冇呀，因為做嘢，不過都好輕鬆啦，shopping嘅時候冇人喺身邊，（係咪碌強強張卡？）碌自己張卡都得啦，都係一盤數啫。」問到佢o依家離巢後慣唔慣，香香話：「其實o依家唔會話慣唔慣，因為今次返加拿大係休息，其實7年前簽嘅約係7年，好自然咁約滿咗，所以決定返加拿大休息吓，好開心嘅。」咁離開大台係咪感覺自由好多？香香話：「其實自己都需要好多方面嘅時間，o依家都俾到好多時間我去探屋企人。」
對於之前有指香香唔續約係要趕生B，見佢今日着住條連身裙現身，身材仲係好fit。佢話：「又唔係嘅，只不過啱啱約滿。生B都努力緊嘅，其實o依家唔只喺香港，喺加拿大同好多地方都有留言，都催我，就算post啲好冇關係嘅嘢，啲人都會聯想到，之前講嗰個Love project其實係一個廣告嚟。」咁TVB有冇作出挽留？香香透露：「其實大家都係好開心嘅，希望有機會都可以再合作。
岑麗香透露上月約滿離開TVB後，已經簽咗新經理人公司，佢個新老闆係王祖藍。
香香話：「其實簽咗祖藍嘅公司，啱啱喺7月中簽嘅。」問到佢好唔好pay，香香笑言：「唔講咁多，其實祖藍都唔俾我講啦！」咁簽幾多年？香香再話：「呢啲再講啦，都夠嘅。」簽約後focus咩工作？香香話：「拍咗咁多年劇集，自己都好鍾意演戲，可以試吓唔同嘅嘢，笑言自己學咗咁耐廣東話，都可以學吓普通話嘅。劇集都想再拍，都有幾個job會做，今日呢個都係祖藍公司幫我接嘅。」被問到將來計劃，香香話都係續工作，o依家份約可以俾到好多時間佢，佢話：「其實自己都需要好多方面嘅時間，o依家都俾到好多時間我去探屋企人，呢樣嘢係做到嘅。」
喺香香婚後，好多人都關心佢嘅造人大計，加上之前盛傳香香離巢係為咗生B，問到香香o依家份約俾唔俾佢有小朋友，香香話：「呢啲嘢順其自然，唔可以話唔俾人生BB㗎喎！o依家都有努力嘅。（祖藍都有努力喎！）佢好明顯有努力啦，戥佢哋開心囉！（亞男嗰啲有冇催你生B？）唔只係佢，反而佢就冇嘅，佢叫我唔好咁大壓力，但好多人催完都叫我輕鬆啲，呢啲順其自然啦，最好收多啲唔同嘅貼士。」
佢又話自己已經加油造人。大會喺現場安排香香同小朋友玩遊戲互動，又準備咗個蛋糕，上面有個BB，喻意亞男有BB，叫香香幫佢設計，香香最後喺個藍色牌上寫上「bless」送上祝福，事後問香香係咪被逼爆亞男BB嘅性別，香香話：「其實我希望揀黃色囉，因為中性啲，其實佢都未講，等佢自己宣佈啦，就算係乜嘢都戥佢開心嘅。」
想BB似邊個多啲？「其實兩個都有好，女就好似似Leanne（亞男）好啲，最好係mix啦！」咁係咪即係外表似亞男、內裏似祖藍好啲？香香笑而不答，仲話：「哎呀，唔好逼我啦！（係咪因為祖藍係你老闆？）係呀。」
此外，講到陳凱琳同鄭嘉穎傳婚訊，香香話：「同佢私下都係朋友，但冇時間問囉，如果係真嘅就當然恭喜佢啦！」
(蘋果日報)
