李泳豪有份投資的食店今日在旺角開張，父親李家鼎、楊明、韋家雄與未婚妻到場支持，李泳豪首次投資食店，向父親請教：「之前我帶咗啲和牛返去整，經爸爸教完味道真係好食啲。」仲爆響口話鼎爺遲下會喺中環開私房菜添。
楊思琦最近推出寫真集，李泳豪微笑搖頭：「我唔回應喇，佢嘅問題我唔回應喇。」又表示沒留意。問到與思琦拍拖時可知對方原來是李嘉欣親戚，李泳豪禮貌地說：「唔好意思，唔回應喇。」
10月6日結婚的韋家雄，開心謂已訂酒席，將在旺角一間酒店舉辦婚禮。之前韋家雄嗌晒救命、話搵唔到場地擺酒，仲妙想天開到搵人share場地一齊擺酒（，好彩依家終於搞得掂。今日呢位準新郎如釋重負，仲溫馨提示大家結婚千祈唔好咁「忟」先搞。韋家雄話筵開二十幾圍，打趣謂：「我行勻晒咁多間呀真係，全香港酒店，搵到個地方都算偷笑喇。」
會否跟太太度蜜月？「要呀要呀，要度蜜月，如果唔係怨我一世呀，每次鬧交拎番出嚟就大鑊，仲諗緊（地點）。」佢仲話原來結婚要搞好多嘢，笑稱「好多瑣碎嘢，諗起都驚，我希望我應付得嚟啦，搵得切呀！」韋家雄嘅兄弟團成員之一楊明拍劇後來捧場，投資嘅食品店將在港島區開分店。
(蘋果日報)
