【半夜入院吊鹽水】陳貝兒:我嬲自己咁都捱唔到

    陳貝兒上月出發去為大台拍攝節目《嫁到這世界邊端2》,尋訪異鄉人妻感人古仔,佢呢次行程長達40日,要去瑞典、法羅群島、波蘭、希臘同土耳其合共5個國家,全程總共要坐19程飛機,諗起都頭痕。貝兒日前去到最後一站土耳其,即係行程第37日,倒數就可以返嚟,點知噚日佢頂唔順病咗要入院。

    今次行程,貝兒同攝製隊全程執晒又凍又熱地方嘅行李,塞爆兩個篋,隨行共5人攝製隊外景,全團三男兩女,貝兒係冇助手照顧,即使出鏡妝頭、服飾全部部由佢自己搞掂。貝兒每到一站都打卡報平安,點知今午就喺facebook貼咗吊鹽水相,異鄉倒入院,認真慘慘豬。佢留話言:「口裏說頂得住,但身體卻很誠實…..#多謝土耳其醫生護士悉心照顧#多謝土耳其人妻夜媽媽車我入醫院#多謝關心而家好好多#只差一點點#繼續加油。」

    陳貝兒早前喺法羅群島,當日天氣好凍(fb圖片)

    據知因為每站行程都好緊密,壓力大,唔夠瞓,加上土耳其氣溫高達41度,噚日仲全日外景,真係收買人命,貝兒拍攝中段已頭暈不適,但佢唔敢講出嚟,怕影響進度,畢竟佢哋進入最後三日倒數狀態,佢諗住頂硬上,但半夜拍完都係好唔舒服,工作人員就帶咗佢去當地醫院睇急症,醫生要佢立即瞓床吊鹽水。因為拍攝進度緊密,貝兒吊完鹽水漏夜又要出院,佢堅持今日頂硬上開工。

    陳貝兒噚晚吊鹽水(fb圖片)

    貝兒呢次去到第三站法羅群島,嗰度係偏遠郊區,山區低溫十度以下佢都撐到,但趕行程,成個月唔夠瞓,佢日前訪問已吐苦水:「行程好密,有啲攰。」點知佢去到希臘天氣開始炎熱,成個月外景chur爆,去到土耳其甚至高溫到41度,外景下乾煎。其實事發前,貝兒都喺Instagram嘅限時動態貼出拍攝相,其中一張係當地氣溫圖。

    陳貝兒正身虎土耳其外景,仲有兩日返港(fb圖片)

    貝兒今日回覆傳媒時,氣弱游絲:「我嬲自己咁都捱唔到,土耳其天氣太熱,外景有啲暈,仲差三日咋,我唔想阻礙拍攝進度,點都要撐埋佢。」貝兒話噚晚半夜入院,吊完鹽水,今日凌晨就出院返咗酒店,佢再抖吓就出動繼拍攝工作。佢話:「仲有兩日,我點都拍埋佢,今次好多謝團隊照顧我,冇事,大唔使太擔心,多謝關心。」

    呢次團隊僅五人(fb圖片)

     

    (on.cc)

    SHARE