梁洛施（Isabella）自從宣佈全面復出後，上周佢出席美容活動，當時佢就講到明唔會俾三個囝囝曝光，唔會帶佢哋參加親子真人騷咁話，但係對於佢自己嘅私生活，Isabella就完全唔介意曝光㗎喎，好似今日佢就係ig度貼咗兩張同鄭秀文(Sammi)、舒淇、馬詩慧同囡囡王麗嘉，與及同佢合作嘅經理人Kim飯嘅相，正所謂「三個女人一墟」，佢哋六個女人兩個墟咁食飯，相信一定嘈到拆天，開心滿分。
Isabella喺ig度貼咗兩張相，見到一班美女，全部素顏上陣，但更亮嘅亮點就Iabella嘅留言，因為佢話囝囝食咗「誠實豆沙包」，完全冇講大話，仲希望佢要keep住落去。
究竟Isabella囝囝講咗乜呢，原來係佢好老實咁點評同媽媽飯局嘅靚女。「去食飯之前囝囝問我今晚我哋同邊個食飯，我話去Auntie Kim屋企同幾個姐姐食飯lol，佢問我咁D姐姐係唔係好似你咁都係拍戲架？我話係呀。有一個叫Auntie Janet係Super Model嚟㗎。」
跟住Isabella就俾咗Sammi張相囝囝睇，再問佢：「媽咪型啲定Sammi姐姐型D？」「Sammi姐姐型D……」Isabella再攞咗舒淇張相俾囝囝睇：「舒淇姐姐靚D定係媽咪靚啲？」「WOW！舒淇姐姐靚啲！」最後Isabella嘅留言係：「最後我同囝囝講媽咪覺得你好乖你好誠實你要keep住咁樣知唔知道！真係俾佢激死」。
除咗Isabella貼相，Sammi亦有喺ig度貼相，佢留言話：「Happy night. 女人之夜。」
(蘋果日報)
