36歲大台視后胡定欣情路坎坷，入行16年先後與吳浩康、馬國明、沈栢淳、音樂人陳明道（Terry）拍拖，可惜每段情都敵不過3年魔咒，前年定欣同Terry分手後，與陳展鵬拍劇傳擦出愛火花，但最後卻跑出真命天女單文柔，感情空虛嘅定欣惟有寄情工作。
陳展鵬拍劇傳擦出愛火花，但最後卻跑出真命天女單文柔 （資料圖片）
正當大家都以為佢冇拖拍，有讀者爆料定欣同備受大台力捧嘅張振朗（Owen）疑暗撻姐弟戀！去年憑劇集《踩過界》上位嘅張振朗，現備受大台力捧，今年接拍新劇《包青天再起風雲》同定欣合作，3月兩人與同劇藝員姚子羚、曹永廉等到橫店及新彊拍外景，朝夕相對兩個月，疑似日久生情！上個禮拜五係張振朗31歲牛一，佢喺社交網晒「展昭」造型生日蛋糕相，捧着蛋糕興奮留言：「佢個頭比我更堅挺」有眼利網民踢爆：「呢個蛋糕牌子係定欣鍾意，而且年年生日都用，係佢送的？」
去年憑劇集《踩過界》上位嘅張振朗，現備受大台力捧（資料圖片）
讀者就認得呢個「展昭」蛋糕，係定欣嘅蛋糕設計師好友Jimmy設計，每年定欣生日，Jimmy都會整蛋糕恭賀，估計之前張振朗跟Jimmy應該唔識，生日蛋糕好大機會係定欣送嘅。讀者仲提供咗兩人嘅ig限時動態cap圖，發現佢哋在橫店拍劇時，相約一齊出去逛街。
而早排定欣做舞台劇《偶然‧徐志摩》，張振朗都有現身捧場，甚至今年6月單立文喺紅館為「搖滾大俠奏」開騷，張振朗都跟埋「胡說八道會」嘅定欣、胡杏兒、豹嫂胡蓓蔚齊齊睇騷，仲入埋後台影大合照㖭。讀者質疑：「奇怪係Owen同豹哥唔熟，為何會埋咗佢哋堆？」
被受大台力捧嘅張振朗，曾與藝員訓練班同學陳芷尤拍拖，惟今年4月兩人各自在網上宣佈分手，強調當中不涉第三者。
4月時同陳芷尤分手 （資料圖片）
隨後記者聯絡到胡定欣及張振朗，兩人齊聲否認戀情，張振朗接受傳媒訪問時表示：「我都一頭霧水。」定欣送蛋糕？佢話：「No~~我屋企人送嫁。」介唔介意姊弟戀？「講真，事業為先啦，其他嘢唔諗住，工作排到出年9月。」
胡定欣表示：「吓？（傳我哋拍拖）咁搞笑咁有趣，佢係好男仔嚟嘅。（張振朗追過你？）冇呀，真係冇！（拖正印男友出嚟澄清？）有時間同人了解先得，之後要同馬浚偉去加拿大登台。」
(apple daily)
