【唔覺得係犧牲】陳豪︰依家做咗爸爸就要割愛

一向愛車嘅陳豪,今日到尖沙咀港威商場大堂,出席寶馬香港50周年活動《JOY IS TIMELESS 禮悅同行》啟動禮,除陳豪外,湯鎮業孖仔湯君慈、湯君耀,霍英東孫女霍詠詩、湛琪清等亦有出席。

廣告

廣告

紮住個髻嘅陳豪以一身型格打扮到場,第一次見到亞洲首次展出1972年的BWM Turbo Concept,台上嘅陳豪與楊洛婷傾偈時,亦大讚車的外形「好爽」,他亦有分享了自己喜歡嘅車款,大會之後亦安排陳豪扭出印上限量版車款的閃卡,以及與一眾品牌高層進行祝酒。陳豪接受訪問時,講到佢係咪有好多車,佢笑言︰「係呀,車真係好多,BB車!因為啲仔大個,考慮要買單車,其實喺加拿大都有單車,但如果攞番嚟會好辛苦,所以考慮要買。」

問到依家買嘢會唔會一式三份咁買?陳豪話︰「都唔會,因為佢哋年紀唔同,4歲、3歲同1歲,兩個哥哥玩嘅嘢差唔多,有啲嘢囡囡未得。好似睇電視,哥哥睇嘅嘢,妹妹未睇得,阿仔又覺得妹妹睇嘅嘢好BB。」問陳豪會唔會電視機都要買幾部?佢話︰「咁又唔使,分時間,冇辦法點買得咁多嘢。」

至於佢仲有冇保留以前嘅戰車?佢話︰「曾幾何時,我剛入TVB時,揸住開蓬車都好feel,不過依家做咗爸爸就要割愛,換咗架七人車,依家睇車最緊要安全。」佢仲有冇保留啲型車呢?佢笑言七人車唔型咩,至於溝女戰車呢?佢話︰「有個部,都係老婆啦!」有沒有兩座位車呢?佢話︰「邊度有呀!依家有兩部車,一大一細,架細車都要坐到一、兩個小朋友,我屋企好似成隊軍隊咁,有家室冇辦法,要照顧晒屋企咁多人,邊可以兩個人。」

講到恨唔恨買番啲型車?陳豪話︰「咁又唔會,有細路之後有好多使費,車對我呢講係奢侈品,我份人都好現實,車由買嗰刻開始已經貶值,(養小朋友係咪增值?)我唔敢講,呢啲係老父嘅說話,總之佢哋自己搞掂自己就得。」

至於有咗小朋友,係咪犧牲好多?陳豪話︰「其實我好enjoy家庭嘅生活,真係唔覺得係犧牲,好似佢哋去咗加拿大,我仲囉囉攣,之前湊佢哋冇乜時間瞓覺,依家係瞓到唔想瞓,電視都睇唔到咁多,有時想同佢哋視像,又有時差,佢哋又瞓咗,不過好快佢哋下個月中就返嚟。」記者笑佢可以過麻甩佬生活,佢話日日做gym。問佢點解唔約朋友食飯,佢笑言冇friend好耐啦,唔通有老婆仔女之後就冇friend?佢話︰「係呀。」

(蘋果日報)