【一早有跡可尋~】鄭嘉穎拖實陳凱琳搭廉航去…

    下月中就49歲嘅鄭嘉穎,同拍拖3年、細佢22歲嘅女友陳凱琳(Grace)終於結婚喇!兩人下月12號喺峇里結婚,噚日(26日)女方終於承認婚訊,恭喜恭喜!


    本報讀者潘小姐今日就透過《蘋果》爆相爆片,直擊上月底、即6月30日喺香港機場見到呢對準夫妻,佢哋喺香港出發去布吉,未知是否預支蜜月啦!由潘小姐提供嘅圖片見到,嘉穎一身黑外套黑褲白波鞋打扮,戴上眼鏡,同有佢英文名短寫Kevin Cheng嘅「KC」字樣紅cap帽;而Grace就戴住黑超,著白色衛衣短褲打扮,身型纖瘦,搭住接駁巴士上飛機。

    潘小姐稱,最初傍晚六點幾喺T2客運大樓Burger King見到佢哋兩個,當時Grace負責霸位,而嘉穎就負責排隊買嘢食:「明顯好多人都認到佢哋,佢哋都好nice,有同人打招呼。」

    之後潘小姐去閘口搭接駁巴士去上機,再於巴士撞番佢哋,原來係搭同一班機,即係廉航HK Express去布吉:「因為我張boarding pass有問題,搞咗一輪,就要上差唔多最後一班接駁巴士,就聽到地勤喺度講,話有明星嚟緊,原來就係佢哋,佢哋等到最後先上巴士,我都估唔到佢哋搭廉航,我自己張機票就大概一千蚊。」Grace家底厚,屋企物業有成15億,估唔到佢同嘉穎搭廉航去旅行。佢哋上到接駁巴士,嘉穎就同Grace一齊坐,拖住傾偈;之後上到機,亦都有乘客認得佢哋。

    抵達布吉機場,兩人都係手拖手排隊等過關:「可能,陳凱琳係拎外國passport,去到櫃位就有啲阻滯,要去填表格再排過隊,鄭嘉穎細心陪住佢。」

    問到潘小姐有冇覺得Grace身型有變似大肚,佢就話:「完全唔覺,因為佢好瘦,我都係睇到新聞見到佢話結婚,就諗起上個月佢哋去布吉,即係預支蜜月旅行。」

    (蘋果日報)

    SHARE