童星出身嘅藝人數之不盡，好似「十五樓嘅牛牛」嘅張繼聰、電影《縱橫四海》飾演鍾楚紅童年「紅豆妹」嘅唐寧、喺電影《行運一條龍》買蛋撻嘅「小芬女」黃美棋等等，大個咗後直情喺娛樂圈發展。
要數九十年代最紅嘅童星，當然係同無數天王巨星合作過嘅「小柏林」鄭柏林！
當年小柏林真係盡得民心，唔單止天真可愛，佢嘅冬菇頭同酒窩更加係標記，三歲就出道嘅佢，拍咗接近十年戲，為咗要應付學業而退出，大個咗後更投身警界，六年前更結埋婚！
「游生」袁文傑喺社交網上載一張同小柏林同埋小小柏林嘅合照，仲留言話：「肯定是我們香港人的集體回憶，不經不覺，已為人父，開心！」
小柏林近年已經榮升為爸爸級，唔少網民見到呢張大合照，紛紛留言：「嘩……小朋友同爸爸一模一樣！」、「餅印」、「真係仔大十八變啊！」同時更不忘向袁文傑催婚，叫佢快啲生個「小游生」咁話！
(on.cc東網)
