胡定欣竟然取消關注陳展鵬（煎pang）嘅ig？係呀！
今日有心水清嘅《蘋果》讀者爆料，指喺定欣嘅ig「追蹤名單」中搵唔到陳展鵬嘅賬戶，有人估計係咪因為煎pang近日高調與單文柔以情侶檔姿態一齊接job，又貼相上ig晒恩愛有關。而陳展鵬嘅ig亦冇follow對方，難度再見不是朋友？定欣同煎pang喺前年拍TVB劇《城寨英雄》開始傳緋聞，當時兩人似係曖昧中，曾被影過做柴可夫車定欣開工，放工又車對方入西貢食糖水，仲孖住睇演唱會。
而定欣又會經常喺ig上載與煎pang合照，仲有tag埋對方嘅ig賬戶，唔少人都話佢哋好襯。而煎pang亦多次讚定欣完美，試過喺ig留言﹕「靈感女神令我打開竅！」真係冧到震啦。當時定欣同煎pang被喻為金童玉女，好快又以情侶檔合作拍《同盟》。
點知去年3月，陳展鵬被《蘋果》影到同落選港姐單文柔喺山頂談情，真戀情被踢爆，煎pang即與定欣劃清界線，並謂﹕「我從來冇同胡定欣拍拖。」真係令定欣hurt到震。
定欣最近亦有新戀情傳出，被指與細佢6年嘅張振朗暗撻，雖然雙雙否認戀情，但定欣冇落閂，講明唔介意姊弟戀，仲轉軚去張振朗ig留言，令緋聞甚囂塵上。
不過咁嘅，胡定欣嘅微博，仍然有「關注」陳展鵬嘅，而陳生都有「關注」胡定欣咁啦……「關係未變」。
(蘋果日報)
