【陳嘉桓清楚哂行蹤】黃宗澤鬧爆吳卓羲:死仔包

黃宗澤(Bosco)同吳卓羲噚晚去咗將軍澳錄影節目,Bosco之前同陳嘉桓傳緋聞,雖然佢哋否認呢件事,不過好兄弟吳卓羲梗係冇錯過機會笑吓佢!

Recall番大家嘅記憶先,上回講到,陳嘉桓直認試過Bosco廚藝,亦到訪過男方屋企開派對,但否認拍拖,又話feel唔到對方有追求之意。不過陳小姐就被踢爆早前去Bosco位於火炭嘅屋企,座駕連續停泊屋苑幾日都冇開走,咁陳嘉桓就解釋話喇:「唔係,呢個係時間誤會,個個都可以揸車去,我有揸車走。」講講下,佢唔小心爆響口表示知道Bosco行蹤,係呀,佢去咗西班牙拍綜藝節目嘛。

噚晚Bosco現身受訪時,講番今次西班牙之旅有幾辛苦咁啦,傳媒即追問佢陳嘉桓有冇上門執屋,Bosco就話:「乜嘢呀?我有請工人姐姐㗎,真係俾你激死!」之後會唔會搵咗陳嘉桓做嘉賓?Bosco即刻話唔知,點知吳卓羲抵死話:「有份都扮唔知啦!」Bosco笑笑口話:「死仔包呀,夾埋佢哋搞我呀!」

(蘋果日報)