28歲無綫新晉男神余德丞（Dickson）前晚踢波期間暈倒昏迷，被送往瑪麗醫院，目前在深切治療部搶救中，仍未甦醒，新聞處表示目前余德丞情況危殆。
無綫官方app在余德丞被送入ICU後，積極開Live匯報最新情況，主持人林子博索性就在ICU外開Live，無綫官方fb page亦全力配合，出post稱「想知最新余德丞情況要留意bigbigchannel，林子博會幫大家跟進最新消息！」、「點擊睇更多詳細報導：余德丞（深切治療）現場」，令網民反感。未知是否因此，無綫和app的官方fb page都減少廣告植入字句，但而ICU外直播則仍然繼續。
《蘋果》今日向瑪麗醫院公關部查詢，究竟醫院範圍為咪可以做直播節目？發言人鄺小姐電話回覆話：「其實就唔prefer嘅，但係佢唔影響到人，我哋又好難阻止，當然最好梗係唔好啦！」鄺小姐又稱暫時未收到有投訴，但院方會派員了解情況。
林子博亦有在Live中回應網民，他說：「可能最近有啲人有睇報道係關於我喺呢度做直播嘅消息，其實我覺得係人哋唔理解我哋作為記者嘅職責工作，或者我哋電視台嘅一啲決定，例如喺度做直播或者採訪。我理解嘅，始終佢哋唔係呢行，佢哋可能未必理解到作為記者職責係啲乜嘢，但我希望大家了解明白，抨擊嘅同時，唔好講一啲影響病人或者病房家屬嘅感受。」
「我相信大家都會慎言，但都會有啲鍵盤戰士，佢哋會喺網上打一啲字上去，寫一啲評語上去，可能講一啲比較難聽嘅說話。講一啲難聽嘅說話我唔介意，但係如果你講個病人，我覺得好似唔係咁恰當。佢屋企人睇到呢啲留言，喺佢哋咁擔心嘅情況下，仲要睇到咁嘅留言，心情會係點樣吖？」
林子博又稱，因為現在消息混亂，故此有需要繼續做直播。「變咗大家可以知道最新第一手消息，知道依家發生緊乜嘢事。」但其實政府新聞處今早亦有回覆傳媒查詢，稱余德丞仍然情況危殆。TVB旗下嘅big big channel喺余德丞入住嘅瑪麗醫院ICU門外做直播，畀網民鬧爆，話為咗為點擊同呃like可以去到幾盡，但big big channel今日仍然你有你鬧，佢有佢繼續做直播。
(蘋果日報)
