【囝囝剛出世幾日發現患上…】李蘊:我會陪佢一齊…

27歲人妻李蘊(Renee)再做媽咪,於18年8月8日「3條8」誕下囝囝,跟兩歲女兒湊成一個「好」字。不過作為媽媽絕對不容易做,皆因又要餵人奶又要照顧小朋友,真係勞心勞力!之前Renee就在網上透露她未完全上到奶,搞到無得瞓。

囝囝剛出世幾天,發現患了蠶豆症,李蘊在社交網晒囝囝嘔奶短片,寫道:「細佬係蠶豆仔(蠶豆症)所以黃疸偏高,今日要照燈啦,不過唔使驚,好快就可以返屋企。」
熟手媽咪李蘊留言:「蠶豆症依家應該幾普遍,一百個人入面都有四個人有,自己表弟同契仔都有,有無蠶豆症bb嘅媽媽分享下湊蠶豆B同普通B有咩分別?」其後李蘊又貼母乳相,留言:「人奶媽唔懶得,就算BB照緊燈唔係身邊,一樣要定時揸/泵出嚟拎去醫院比BB食,大半天的成果,對於未上曬奶嘅我嚟講,都ok滿意啦。」

對於囝囝患有蠶豆症,李蘊接受電話訪問表示:「囝囝有蠶豆症,唔算太擔心,但聽到醫生講時,都會:『咦!有吖!』我會小心啲帶佢、湊佢,其實自己契仔同表弟都有蠶豆症,所以我都有接觸蠶豆症嘅小朋友,覺得同普通小朋友完全冇分別,只不過要避開一啲容易發生反應嘅嘢,例如蠶豆、藥油、薄荷等等。」

為了囝囝健康,李蘊會陪囝囝一齊戒口:「湊佢時候小心啲,而且自己餵母乳,要避開一啲唔可以食嘅嘢,陪囝囝一齊戒口,我諗將來都會同佢一齊戒口,唔會令佢咁孤獨。」至於網民提供嘅意見,李蘊都覺得好有用:「我當然會過濾一下,同埋問番醫生意見。」原來李蘊媽咪係有牌陪月,可以幫手湊孫:「我未有第一個B時,我媽為咗將來湊孫去學去考牌,跟住都做咗幾個job,依家當然湊孫啦。」

 

 

 

 

(apple daily)