【Baby Lee變成Baby Fat】杏兒見證求婚:都聽到眼濕濕

    胡杏兒噚日到深圳出席珠寶活動時,咁啱呢一日係七夕節,活動上佢見證一對相識十年,拍拖八年嘅戀人修成正果,喺佢面前求婚成功,令杏兒大為感動,佢笑話冇諗到今年嘅七夕過得咁浪漫:「聽到佢哋嘅戀愛故事,自己都聽到眼濕濕,祝福一對新人白頭到老。」

    雖然噚日要開工,不過杏兒早已為家中兩位大小情人分配好時間,總之個個都浪漫冇分大細,杏兒笑話:「近排放多咗時間喺囝囝身上,所以噚晚做完嘢之後,即刻趕返港同老公享受二人世界,拍拖應下節。」

    問到有冇計劃同老公生多個BB?杏兒就話:「順其自然啦!不過多一兩個小情人都好welcome。」另外,杏兒近日有留意到登革熱增加個案,所以近排減少同囝囝去公園玩,驚會被蚊釘,仲將原本已肥嘟嘟嘅Baby Lee變成Baby Fat,就算去街都做足防蚊措施,儘量安排室內嘅親子活動。

    SHARE