佢哋終於完婚喇！期間二人着上大紅喜服舉行大婚拜堂，謹言激動咁話：「好不容易啊！」男方都忍唔住話：「這是傅恒的夢想。」睇到一班網民眼濕濕，話佢兩個終於可以喺埋一齊喇！
大陸宮廷劇《延禧攻略》掀起追劇潮，吳謹言扮演嘅「魏瓔珞」（吳謹言）同「富察傅恆」（許凱飾）最後無緣廝守！不過，湖南衛視《快樂大本營》節目造就大團圓，安排兩人着大紅喜服現身，好似舉行大婚拜堂送入洞房，吳謹言交足戲激動到眼紅紅：「好不容易啊！」
《快樂大本營》安排兩人大婚圓夢（網上圖片）
扮演女主角「魏瓔珞」嘅吳謹言一夜爆紅，工作停不了，上個禮拜四踏入28歲生日，吳謹言都要開工冇得放假慶祝，不過佢好識冧粉絲，生日當天透過玩直播答謝粉絲：「非常感謝你們喜歡魏瓔珞。」其間吳謹言突然狂笑，原來係「皇上」聶遠捧着生日蛋糕驚喜現身說：「謝謝你們喜歡她（吳謹言），她值得你們喜歡。」
聶遠還介紹自己嘅「正宮娘娘」老婆秦子越，兩夫婦齊齊現身賀吳謹言生日，聶太在鏡頭前吻賀壽星女，吳謹言因為太過興奮激動，在許願前唔小心3次整熄蠟燭，要聶遠重新點蠟燭才順利許願。之後聶遠臨離開時返轉頭，對住鏡頭抵死問：「為甚麼老叫我大豬蹄子（指男人變心）！」吳謹言爆笑說：「你不是走了嗎！」
劇中「魏瓔珞」為咗同枉死姐姐報仇，終日愁眉深鎖，但現實中嘅吳謹言性格活潑可愛，佢話去年生日時，自己人在「延禧宮」拍劇，如今剛巧播出自己在延禧宮嘅戲份。吳謹言還在直播中講到「富察皇后」秦嵐，大讚：「完美的女人，我很愛她。」至於扮演乾隆嘅聶遠，吳謹言笑說兩人係四川同鄉，覺得皇上特別萌：「他對所有的妃子都很真心、都很愛。」
（apple daily）
