【兩公婆貼地搭港鐵】自認慳家:我都唔想老公浪費錢

有讀者向傳媒分享自己坐港鐵巧遇佢同佢老公嘅相片。呢位讀者話撞見佢哋當日,係個平日嘅下畫:「大約下晝3點,喺港鐵調景嶺站上車見到佢同佢老公,架車就去寶林方向嘅,佢同老公兩個坐喺度各自篤電話,之後仲蹺實老公隻手,佢老公都好nice,嗰日我同小朋友一齊,可能佢聽到小朋友講嘢聲,都有望一望過嚟笑吓!」

(讀者提供圖片)

林芊妤(Coffee)懷孕8個月,日前同佢個爆肌老公翟志榮(Weng)即興飛韓國過「二人世界」。

而Coffee喺出發前,喺ig貼咗啱啱做完產檢,企喺屋企露台影嘅相,仲留言話醫生話BB頭大,但係腿短同埋肚仔大。原來嗰日Coffee老公Weng都有同行,高薪厚職嘅Weng仲陪Coffee貼地搭港鐵㖭!

陪老婆貼地搭港鐵㖭!(讀者提供圖片)

傳媒聯絡腹大便便嘅Coffee,問佢點解唔買架車代步?係咪老公冇車牌?Coffee笑住話:「有車牌呀!佢都有諗過,不過我話唔使住,香港咁方便,都唔使買車啦!」Coffee又自認慳家,唔捨得買車。佢話:「車位又貴,我都唔想佢浪費錢,可能有小朋友再諗,o依家仲OK嘅,或者到時我都考番個車牌先。」

 

 

(apple daily)

SHARE