女神岑麗香早前宣佈離巢大台，有傳香香公主要準備生仔，搞到唔少fans，特別係男fans受好大打擊！香香現在嘅老闆，變咗係老友李亞男個老公祖藍，香香坦言合作自由度比以前大。。。
喺加拿大休息兩個月後回歸香港工作，仲加盟王祖藍旗下。日前香香喺粉嶺拍攝離巢後第一個廣告，佢著住超短熱褲，大騷42吋美腿；佢仲不時嘟嘴賣萌，喺陽光照耀下，更見明耀照人，真係唔使執相都咁索，好難得。
香香朝早四點就要出發到拍攝場地，拍到下午個樣依然咁精神，佢話：「今次幫護膚品牌拍廣告，開心價，同拍劇唔同，好多時拍廣告好仔細，有好多人照顧，同埋一定要靚，呢個係好開心事，對白又少好多。不過有關於肌膚嘅對白要記，冇咁口語化，我都要努力去記。」
香香現在嘅老闆，變咗係老友李亞男個老公祖藍，香香坦言合作自由度比以前大，香香話：「我覺得有多啲時間休息，因為平時拍劇好密好密，又要追劇本，每隔幾日七、八十版中文字劇本要睇，對我嚟講會辛苦，拍廣告就幾句對白啫，可以擺多啲心機去做到更靚更舒適感覺。」
如今李亞男懷孕當媽媽，香香有冇羨慕？佢話：「唔係羨慕來形容，一直陪住朋友成長，感覺好幸福同感動，大家一齊同行，可能佢早我少少啦，唔緊要啦，總之見到都好開心。(係咪要加緊造人？)呢啲嘢唔逼得，交俾上天，我會努力，大家放心。」
(蘋果日報)
