【帶Luken去探Kary】Miki楊愛瑾:隨時都可以

藝人楊愛瑾(Miki)身穿秋冬裝出席活動,受訪時Miki就冧笑話剛與老公郭永淳去法國南部加西班牙「二人世界」旅行,又指從來都未試過離開16月大囝囝Luken咁耐:「都去咗兩個星期,係老公話即使有咗囝囝都要有番少少自己嘅時間,所以都講咗每年最少都去一個Trip。(去咁耐唔掛住囝囝?)一開始都會特別掛住,但後尾都好放心,因為都幫佢安排晒啲節目,例如會去Playgroup、婆婆會探佢,又會同爺爺嫲嫲食飯,咁自己都有同佢FaceTime。」

Miki續大爆囝囝於Playgroup入面好鍾意同其他姐姐玩:「會拖住啲姐姐行。(好有異性緣?)咁唔知啦,但佢好多嘢講,依家仲會學我哋講嘢,所以喺講嘢上面都會小心啲。」又指有睇湊B的資訊,發現小朋友2歲前最好不要睇電視,所以家中現時都沒有安裝。

帶囝囝去探Kary

講到吳雨霏(Kary)剛誕下男B,問到可會帶埋囝囝去探B?她表示冇所謂,只要對方Ready就隨時都可以:「都有恭喜佢生B,但都知佢依家會好忙,好似都生完未夠3個月,當時Luken出世後大半年我都覺得過得好快。(如果探B會買咩禮物?)未諗呀,但都會以實用為主,例如尿片呀、衫咁。」

(on.cc東網)