【做完手術】53歲羅霖六年使五百萬:冇一個人相信我

    「美魔女」羅霖今日53歲生日,佢就同孻仔Jonathan、一班友人慶祝,佢班女朋友仲好有心思整咗兩個、兩尺高嘅番梘玫瑰花bear bear畀佢,相當少女feel。

    《蘋果》就搵過羅霖,佢就笑言:「少女feel就應該冇,仲有少少,少女心。」講到生日派對,佢就話因為剛做完割粉瘤手術不久,都唔係好想慶祝:「年紀越大就唔係好想慶祝,加上之前做手術,體力差,不過朋友好有心,好早book咗,自己成日都有個願望去睇薰衣草,今年有女朋友陪我去睇,不過我冇時間。」

    「又大一歲,覺得歲數係一個數字,最緊要身體健康,心境正面,諗返起呢6年幾做單親媽媽生活,好多甜酸苦辣,希望要堅持,堅毅走未來一步同人生。」

    咁三個仔有冇表示呢?羅霖笑言:「噚日搭正12點,老二喺美國send WhatsApp同通電話,大仔去咗美國旅行,有同我WhatsApp,細仔今年第一次話叫我自己揀禮物,喺佢利是錢度扣,不過好笑,佢利是錢唔係好多。」

    再問到願望,會否想搵另一半,羅霖就表示:「願望當中,呢個排最後,健康、兒子、父母、工作、有另一半,因為男人靠唔住,最緊要自己經濟獨立,內心強大堅持!」

    近日,因病入院割瘤,羅霖聲線中氣不足,講到身體狀況,佢說:「今次做手術係全身麻醉要插喉,傷咗喉嚨,所以把聲差咗,同身體有麻醉藥敏感,當時有啲危險,佢哋見到我個樣腫晒,問我使唔使氧氣,成6、7個人加埋主任,唔好意思咁醜樣畀人睇到,擔心我,幫我打咗三支防敏感針同一支腎上腺素,因為血壓降低,知道身體抵抗力越嚟越低,o依家要有一張卡喺身,有啲咩藥物敏感,要24小時喺身。」

    羅霖仲話,最希望係要有健康,同少啲壓力,皆因獨力養三個仔,真係好吃力:「三日前去律師樓,計一計呢六年幾支出同收入,原來照顧呢三個仔讀書、生活費、租金等,有五百幾萬。o依家由零開始,如果堅持唔到,想佢爹哋照顧返兩個大仔,太大壓力,但又好愛佢哋!」

    「呢六年嚟,冇一個人相信我贍養費係零,到噚日仲有人問緊我,冇可能冇贍養費,真係零。大仔喺外國讀咗三年,都起碼用咗150萬,二仔喺美國讀咗兩年,都百幾萬,0依家未讀完,因為美國要讀四年,o依家讀緊第三年,大仔又返咗嚟讀理工。」

    (蘋果日報)

    SHARE