【自己一直忍手】胡定欣被飛起冇份…

胡定欣今日身上配戴價值超過500萬鑽飾喺中環為珠寶首飾店進行揭幕,定欣話佢同一般女性一樣鍾意鑽石,自己亦努力中,希望買到一啲收藏,但就話:「自己嘅諗法係某一隻鑽飾戒指,要留畀另一半送,所以自己一直忍手冇買到,反而媽咪好sweet,將爸爸當年送畀佢嘅求婚飾物,分拆做咗耳環同一隻戒指,將戒指親手戴喺我手上,我覺得好珍貴。」

胡定欣直認期待真命天子送上呢顆鑽飾,佢話:「希望有一日有呢個機會,唔使太大粒,我好論盡,太大粒會唔捨得帶出街。希望到真正求婚時有驚喜,始終係女性憧憬。」目前係定欣嘅休息階段,下月會去澳洲,之後就會同姚子羚及曹永廉去瑞士拍攝旅遊節目。

定欣有份演出嘅《城寨英雄》及《同盟》兩劇班底將再開新劇《曼谷唐人街》, 但定欣就被飛起冇份拍,佢話:「唔緊要,選角方面監製有佢嘅原因,我下半年會休息搵外快,之前拍劇都用咗好長時間,趁呢啲時間可以賺多啲錢,唔係點買鑽石呀。」佢話自己唔會推劇,並話:「遇到適合工作就會去做,好似近日自己有份演出電影《逆流大叔》票房幾好,自己係電影業初哥,係一個新體驗,希望自己第一步有好成績,又拍到鎮宇哥,日後就算做妙齡大嬸又好,咩都好,希望拍到好嘅香港電影。」

(蘋果日報)