近年鍾意返大陸拍劇搵銀嘅周海媚（海味），最近喺電視劇《香蜜沉沉燼如霜》裡面餘演天后荼姚，呢個角色除咗法力無邊之外，仲要係一個大反派，雖然睇到大陸網民都咬牙切齒對天后恨之入骨，仲大讚海味演得好。
當大家大讚海味演得好嘅同時，唔知係咪有人對海味呢個反派角色入戲太深，有班網民竟然走咗去海味嘅微博，用一啲人生攻擊嘅字眼去鬧爆海味，如「看了這個電視以後覺得你真的好醜」、「大暴牙，噁心死了」、「趕快去把你的大齙牙做了去，演技攔就不說了，牙真是太影響大眾眼睛了」，除咗人生攻擊外，亦有人批評海味演技「感覺不管是生氣還是平靜都只會咬牙瞪眼」、「都老演員了還演成這樣，什麼情緒都要大瞪眼。浮誇粗略。看看隔壁佘詩曼演的壞人。」等等，而讚好同彈爆嘅網民更開始出現罵戰。
睇見一班網民鬧得咁激烈，搞到海味都心灰意冷，昨日喺微博出post，表示自己會退出微博：「成長於一個母親和外婆都信佛的平凡家庭，我從小受到的教育是，做人要善良，也不能被他人欺負。網絡時代，理解情緒大於客觀的輿論生態；身為藝人，把自己的一切交付到顯微鏡下被凝視也是職業宿命。但當思考被情緒裡挾變成潮水方向，我選擇激流勇退。一生何求，誰計較讚美與詛咒。陌生人你好，感謝你的愛意和乖張（義解「不順」或「不相合」），微博再見，繼續我的地闊與天長。」
海味更在post中張貼咗一條2分19秒影片，影片中有海味出道至今嘅相片，而最後係寫住「微博，再見」。
(蘋果日報)
