【一直都同自己講冇事嘅】Bob突然入院:原來係可以好大鑊

藝人林盛斌(Bob)有老婆同埋四個小朋友,加埋兩位家傭,要養起成頭家真係唔易,日做夜做冇時停終於捱病咗!

佢喺IG發咗一張身在醫院嘅相,右手貼上膠布同有針插血管,仲留言:「一直都同自己講,心口少少痛啫,抖返順條氣,冇事嘅。點知………..原來係可以好大鑊。」Bob仲講笑:「揸波仔我就話熟手啫,通波仔就真係第一次。老實講,係有d驚嘅!」
估唔到阿Bob得38歲就要「通波仔」,冠心病年青化真係不容忽視。Bob身型不嬲都肥,相信真係要小心身體,注意飲食,同唔好太操勞,畢竟有3女1仔,大女霏兒就10歲,孻仔道申就啱啱1歲,真係仔細老婆嫩。

佢回覆東網表示:「有心有心,手術成功,三條血管塞晒,通咗兩條,仲有一條過兩個月先再做,呢幾日要好好休息!你哋都要注意身體健康,定期 body check!」

(on.cc東網/蘋果日報)