張栢芝今個月初忽然幫IG大清洗，將上載咗嘅相全部刪除咗，追蹤嘅人都只留底4個，但其後佢又陸續再上載咗啲新相，包括上周日喺IG貼家中貓咪x-ray相兼留言：「四個B.B.迎新生成員」。
原來係佢飼養嘅媽咪懷孕就生得，唔少網民都恭喜佢就快做婆婆，不過栢芝近日又將呢批相刪除，帳戶追蹤名單更只有1個人留低，真係唔知係咩玩法。
雖然唔知栢芝點解又刪相又貼相，但今日佢又再更新Ig，仲上載咗幾條短片，宣布四隻貓咪已經出世，真係恭喜晒呀！
栢芝好開心咁拍咗幾條片，逐一介紹幾隻相信出咗世唔係好多日嘅貓BB，而貓BB嘅顏色就以灰白為主，栢芝一邊旁白一邊拍片，有啲係四隻貓BB痴埋一齊瞓覺，又有貓媽媽照顧BB嘅温馨片。
其中一條短片就係影住第二隻出世嘅貓BB，栢芝仲話呢隻BB好懶，仲幫啱啱舉起咗手仔嘅貓BB配音，笑住話：「喂你你咩呀！唔好呀！」
(蘋果日報)
