【首度談及Edison】秦舒培:父母最初唔接受

    陳冠希(Edison)出道多年,一直予人壞孩子嘅印象,但自從遇上大陸名模秦舒培,女方仲為佢生下囡囡Alaia後,呢個「壞孩子」Edison就搖身一變成為「炫女狂魔」嘅慈父。

    最近Alaia嘅媽媽秦舒培就接受雜誌專訪,首度談及佢對呢位「壞孩子」嘅第一個印象。

    秦舒培與Edison相戀3年,雖然佢哋仲未簽紙結婚,但二人已育有一女Alaia。秦舒培最近接受雜誌專訪,講到佢對Edison嘅第一印象,佢話最初係喺ig到見到Edison鬧一個失禮嘅部落客。當時秦舒培就覺得Edison好Cool、好真實,第一個印象係好好嘅。之後,佢喺一個時裝周活動上,透過朋友認識到Ediosn,認識深咗就發覺佢係一個好有趣、好細心同好聰明嘅人。

    與Edison交往後,秦舒培坦言好多朋友都唔理解,就算去到美國,仍然會受到四方八面嘅壓力,而喺嗰段時間,佢亦睇清楚好多人同事。至於父母,秦舒培指初時父母都唔接受Edison,為咗改變父母對男友嘅印象,秦舒培迫佢哋去美國見男友,當佢哋見過Edison後,想法就改變咗喇。但秦舒培重申,父母接受Edison成件事都好自然,男友亦冇做特別嘢嚟討好父母。

    至於同Ediosn嘅愛情,秦舒培覺得佢哋嘅愛情好簡單,「就是每天只要在一起,做最簡單的事情都很開心。」佢仲話,佢哋一齊嘅時候諗到乜就做乜,完全冇束縛,是一種好舒服嘅狀態。

    愛很簡單,咁Edison做過乜最令秦舒培感動呢?佢嘅答案同樣簡單,佢話同Ediosn一齊,無論自己想做咩,對方都會支持,所以佢認為「支持」係最重要,亦覺得呢兩年自己嘅自信多咗,有工作就去工作,冇工作就湊女同陪Edison。

    (蘋果日報)

    SHARE