【緊急通波仔後首現身】Bob PO合照竟然係為咗⋯

現年38歲嘅藝人林盛斌(Bob)最近入院緊急通波仔,三條血管塞晒嘅佢今次手術成功通咗兩條,仲有一條過兩個月先再做,依家就好好休養。雖然早前佢「宣布」做手術時已經喺社交網上載隻手插晒針嘅入院相,不過自手術後佢一直未見人,到咗今日,Bob終於都「現身」喇!

今日佢就上載咗佢同手術負責醫生嘅合照,相中Bob晒出一貫嘅招牌笑容,精神相當唔錯,仲舉晒V,加上佢咁有閒情逸緻上載社交網,睇嚟都冇咩大礙,而且今次佢發文嘅重點……竟然係幫醫生做媒人!

佢勁Sell醫生事業有成又穩重,仲話「我係女人會主動溝佢」,出盡力幫手「拉客」,仲叫有興趣嘅網友私聯自己添:「咁嘅,幫我做手術嘅呢位醫生,叫Jason,40歲,養X心臟科主診醫生,事業有成,有上進心,絕冇不良嗜好,成熟,穩重,工餘時間熱心公益,我係女人會主動溝佢,而個重點係………..佢單身。咁點解佢會冇女,我相信主要係因為「悶」,我聽佢講解個手術同巡房傾偈嗰陣我爭啲瞓咗!各位姊妹,有需要PM我!」

網友見Bob咁精靈,都紛紛留言話放晒心,仲有網友話辛苦晒Bob,病咗都咁有心,果然夠晒「義氣」!

(on.cc東網)