【絕不能對孩子說的話】林嘉欣:第一唔可以講⋯

林嘉欣今年為拍新片,婚後首次放下女兒及老公,在澳洲留足一個月,事前功夫做到足,令女兒覺得媽咪不在港但依然在身邊。

***30天每日一信
「係我變咗痴媽,結婚以來第一次離開咁耐。我飛之前寫定30日的信,因為我知啲女每日行程,例如上課外活動呀,所以就會問佢『今日好唔好玩呀」,臨上機前,寫定30封信,之後就請爸爸、Auntie每日放響信箱,等佢地好似有些嘢期待咁。」女兒都有回信給她,等待她回來拆信。

***媽媽也會有錯
嘉欣今個月40歲,大女Kayla二女Sofie也分別七歲、五歲了,談到女兒很快就會進入反叛期,「我容許佢反叛的,因為屋企,大家都有權利發言的。我唔會話,因為我係媽咪,所以你要聽我講,不會。我反而希望啲女知,我都有軟弱的一面。」試過一次,女兒開大音樂聽Beyonce、Katy Perry,令她大吃一驚,「因為歌詞入面有啲message,好似你俾你電話號碼我,我打俾你,邀請你來我屋企之類,我就覺得:咩黎架?但反而我要慢慢去調較自己,唔好即刻嬲咗,要寬容啲。有時嘈交,我都可以認輸,因為我都可以有錯。」

問到有甚麼說話是絕不能和子女講,「第一,唔可以講:我都話架啦!呢句係死刑嚟!等於翻舊帳、double message;第二係,你幾嬲都好,唔好用啲『唔要你!唔愛你!送咗你俾人!』」母女之間一定有吵架,但她堅持有不快當晚要解決,「會臨瞓前去攬下佢,幾分鐘係攬,俾佢知道,無論大家有幾唔同,點都好,媽媽係愛你。」

***
作為媽咪,她更渴望為社會出一分力,今年第四年和麥當奴合作推出慈善繪本,傳遞護苗基金訊息,「我亦有俾自己幾個限制,第一,我唔可以講性侵害呢三個字;第二,我亦唔可以標籤啲壞人,第三係,我真係希望救得一個就一個。」

(蘋果日報)