01年加入大台訓練班之後成為藝人嘅鄭世豪，喺13年參加大台自己友歌唱節目《星夢傳奇》彈出，之後再簽星夢做歌手，更喺《愛·回家之開心速遞》做「細龍生」入屋，仲要係大台籃球隊隊長添，仲被網民封為TVB侯活。
不過，咁多才多藝嘅鄭世豪都有老貓燒鬚嘅一日。
繼袁偉豪跌銀包之後，噚晚「細龍生」鄭世豪喺IG貼文話自己唔見咗一卷錢，總共一千九百蚊，仲話係一張一千、一張五百同埋四張一百蚊組成，呼籲如果有人執到就話佢知，佢仲寫道：「噢～不知是剛剛在球場上，還是回家途中，在小巴上…不見了！」 。
但係，紙幣呢家嘢又冇記認，睇怕想搵返都有唔少難度，或者，如果有人搵得返，「細龍生」會用呢一千九百蚊重酬多謝呢位善心人呢？
(apple daily / on.cc)
