【攬住甜笑】吳卓羲要儲小朋友本:到時就可以放心唔做嘢陪老婆

    剛踏入39歲嘅吳卓羲(Ron),昨日與楊愛瑾、姚子羚、楊明及單文柔等,到灣仔出席活動。

    三哥苗僑偉日前幫Ron搞生日會慶祝,但就有人將生日會裡嘅相放上網,而其中一張相,相中嘅Ron攬住身邊一個女仔時笑得好開心。

    問Ron係咪有新戀情?佢就話:「其實識咗好耐,現場所有人都好熟,三哥聚集成班朋友搞咗個party,個個都識,搭住膊頭就唔一定係女朋友。」

    問Ron做乜唔拍拖?佢話:「暫時唔搞呢啲嘢住,邊有時間?如果真係(有拖拍)嘅會講俾大家知,因為唔講嘅話又會俾人話,我朋友係圈外人,其實佢post呢張相之前都有問過我,我話冇問題,跟住佢就放咗上網,當晚成班朋友一齊食飯好開心。」

    至於感情冇着落?Ron仍然以「冇時間」為理由解釋:「拍拖都要時間㗎嘛,自己都要忙拍戲,嚟緊又要籌備新一輯《飛虎》,啱啱先同劉心悠拍完電影,所以拍拖呢啲之後先算。」

    問到會搵圈外還是圈內女仔拍拖?Ron話:「冇乜所謂,鍾意起上嚟就鍾意,冇話圈內圈外,呢啲都係睇緣份,其實同女仔拍拖都要俾時間培養感情,自己都希望有多啲時間拍拖,不過都要努力做嘢搵多啲老婆本。(你都搵夠啦!)咁要儲小朋友本,如果生小朋友都要準備錢,到時就可以放心唔做嘢陪老婆,不過我自己就唔急。(係咪想到50歲先結婚?)暫時未諗到,而家專注拍咗電影先。」

    至於同場嘅楊愛瑾就表示o依家忙住湊小朋友:「嚟緊準備上學前班,自己對小朋友讀書唔太緊張,係身邊嘅朋友緊張,而老公喺教育方面都有主見。(會唔會送小朋友去外國讀書?)老公想佢喺香港讀到某個年齡先去,但都要睇佢到時發展,不過我就唔捨得。但自己跟埋去又好似對婚姻唔係咁好。」問佢會唔會再追多個?佢就話:「順其自然,當然如果可以生個女就更圓滿。」

    (蘋果日報)

    SHARE