【仔仔讀兩間幼稚園】諸葛紫岐唔認係怪獸家長:依家好多家長都係

諸葛紫岐今日到灣仔出席時裝展,提到4歲囝囝薛華韜日讀2間幼稚園,佢表示囝囝好開心:「o依家好多家長都讀兩間學校,問過佢(囝囝)都話好開心,有新同學又有舊同學,(讀兩間會唔會太辛苦?)佢話唔會、好鍾意,所以我咪由佢囉。」

至於怕唔怕俾人話係怪獸家長,諸葛紫岐就表示:「我梗係覺得自己唔係啦,我真係有問佢想唔想返,佢話『2間都想返』,所以都係等佢自己決定,總之佢自己要開心,要自己諗啱唔啱、同埋有乜後果。」至於老公薛嘉麟又有冇俾意見?諸葛紫岐就話:「佢(老公)話都俾佢試吓,大家都有問佢(囝囝),佢又鍾意新地方、唔同嘅嘢,又玩吓啲新奇嘅嘢,都OK嘅。」提到囝囝係唔係資優生?佢就話:「都有check,(幾多分?)幾多分唔緊要,鍾意番學最緊要。」

另外,同場嘅鄺美雲話Dorian好多時都會幫佢設計晚裝,但依家自己就多數會着行政服裝多啲。提到中秋節,佢話會喺香港過,因為最近收咗個契仔,依家契仔兩歲幾,周不時都會同佢玩,好開心。

(蘋果日報)