【姚嘉妮獲讚掂】老公林祖輝﹕媽咪係infinity

    近年「亞視幫」喺無綫發圍,田蕊妮、陳展鵬、袁文傑、陳煒等一個個彈起,姚嘉妮(嘉嘉)喺2001年已過檔大台,無論演忠、奸或是潑婦、八卦師奶角色都恰如其分,早前在熱播劇《BB來了》,40歲人扮過氣MK妹陪月員仍被稱讚冇違和感,可惜多年來主力被派做《都市閒情》主持,未有機會上位做一姐。

    林祖輝曾在無綫當經理人,問到有冇幫太太一把?祖輝話﹕「我只係公司小職員,唔可以左右到監製啲乜。以前我高峰期,除咗Manage苟芸慧、金剛、龔嘉欣,仲有50幾個新人。新人好簡單,捉上去戲劇部直接介紹畀監製認識,見真人好過睇相;但嘉嘉本身係藝人,唔適宜咁做,透過真正合作同認識更重要。」

    40歲嘅嘉嘉雖然係兩子之母,與祖輝育有分別係9歲囡囡Kyra同6歲囝囝Kyros,但身材同樣貌都Keep得好好。祖輝亦讚老婆忍得口﹕「佢好鍾意食嘢,又易肥,但就好忍得下,會做好多運動。」

    未能突圍,會否替嘉嘉不值?祖輝話﹕「冇話抵唔抵,好多時練十年就係等一個機會,我覺得佢係有潛質,自己係TVB做過我知,咁多藝人咁多監製,監製未必好多時間去了解一個藝人,但如果有越多機會,發現原來佢演癲癲喪喪都得,咁其他人或者都會睇到,有潛質嘅就自然有人度身訂造角色俾你,拍劇真係好睇天時地利人和。」

    祖輝曾經到過北京做國家級運動員的經理人,但工作一年便決定回港,佢直言為咗屋企人﹕「當時太太知道有第二個小朋友,咁就開家庭會議,一係一家人上北京住,一係我返落嚟。咁北京天氣冇香港咁理想,最後決定返香港,就做咗童裝生意。」林祖輝直言在子女心目中,評分一直落後太太,佢苦笑話﹕「女女話Daddy一百分,但媽咪係infinity(無限),我咪慢慢追返分。」

    祖輝表示從來唔會俾小朋友有讀書壓力,佢笑言﹕「因為家長唔想有壓力囉,我俾小朋友讀國際學校,都係唔想佢哋有太多功課同考試壓力,見囡囡現在都好鍾意返學,每朝自己起身、刷牙,做乜都唔使逼。」

    (蘋果日報)

    SHARE