Jason爆陳豪曾經講過生仔好開心，問係咪生女仲冧？陳豪即解釋：「唔可以咁偏心，三個一樣愛、一樣錫，不過個女嗲啲，仔都黐我，邊個都鍚。」
藝人陳豪出席揭幕禮，台上司儀陳智燊（Jason）問陳豪有關近日搬屋的傳聞，陳豪直認係「孟母三遷」，由大埔搬往南灣遷就仔女返學：「小朋友返學喺港島區，終於都向現實低頭，唔想小朋友花時間喺車程上，真係嘅！父母係會為仔女搬屋。」
新手爸爸Jason即場向陳豪請教如何湊仔，陳豪稱冇特定方法，認為親子關係才最緊要，他說：「今時今日我都學緊。（有乜嘢難倒你？）日日新鮮日日『甘』，同小朋友嘅關係係要時間，小朋友光陰好快過、要珍惜。（過去一年有乜嘢難忘事？）每個小朋友出生嘅過程，每一個經歷都唔一樣，性格慢慢形成，對我嚟講，起身抱吓佢哋、鍚吓、攬吓就最Enjoy。」
(on.cc東網)
