今日係大陸女星范冰冰嘅正日生日，最近捲入避稅風波嘅佢已經神隱咗超過兩個月，外界都唔知佢到底近況如何，不過今日有網民發現范冰冰嘅微博自動跳出生日祝福訊息，但大約五分鐘後，「范冰冰」上線並刪除咗呢條微博，有網友話：「原來冰冰一直都在！」，之後佢嘅微薄又恢復之前嘅停滯狀態。
日前大陸官媒《環球時報》撰寫社論建議稅局要俾外界知道范冰冰現在嘅狀況，以免造成人心惶惶。不過《蘋果》據知情者消息指，冰冰俾稅局調查咗一輪之後，已經安全返咗屋企一段時間，只不過稅局要求佢喺調查結果出嚟之前，唔可以向外發放消息同接觸外界，所以佢一直好低調，唔敢同外界接觸，等結果出台，佢先知自己有冇事。
今日生日范冰冰都係靜靜喺屋企過，冇特別慶祝，朋友發生日訊息俾佢，佢一樣冇回覆，唔怪得導演李玉同陳嘉上要喺自己微博祝佢生日快樂！
(蘋果日報)
