【12年後再同鍾嘉欣合作】林文龍:覺得係了咗一個心結

喺2017年回歸無綫拍《不懂撒嬌的女人》而爆紅嘅林文龍,承接《不懂》再同關樹明合作拍《再創世紀》,因為係合拍劇嘅關係,大陸嘅觀眾可以率先睇晒,結果今次好多網民cap圖留言讚林文龍,尤其係佢同郭晉安、潘志文嘅戲,最重要嘅係佢同鍾嘉欣相隔12年再度合作,為當年《法證先鋒II》圓夢!

 

日前林文龍喺尖沙嘴接受訪問,對於網民嘅留言,佢話:「當然一定係好睇先吸引到佢哋,所以我睇完之後,係吸引人,我都有俾老婆睇,佢睇完都話好鍾意,期待喺香港播時候,諗住踎喺度睇,不過我都預先講話呢啲CAP出嚟係精采,唔好諗住場場戲都咁精采。」其實今次林文龍飾演Duncan呢個角色,正如佢話因為個人有經歷,賦予咗生命,變咗睇起嚟覺得好立體,更加集中喺演員身上,佢話:「Duncan呢個角色可能比我本身仲要多,好開心網民鍾意,事實上演繹上幾滿意。」

林文龍話喺對白方面都有啲修改,之但係呢套係合拍劇,唔知有冇限制?佢話:「確實我唔知,始終創作嗰個唔係我,但係表面上有啲嘢係要配合審批同配合,試過有啲嘢係劇本出咗嚟,但係喺現場編審突然要開會再度一度,有啲嘢修改。」雖然今次有唔少觀眾讚賞,似乎有助打北上發展,不過林文龍話:「唔知㗎,隨緣喇,有啲嘢唔係你想就得,不如專心做好件事,o依家有2個香港同2個大陸嘅劇本,慢慢揀,就算4套啱都唔會接晒,我向來係貴精不貴多。」

講到當年《法證先鋒II》嘅情意結,林文龍話:「係圓到好多人嘅心願,嗰陣有好多觀眾,不約而同都拎住呢段戲嚟講,希望我哋可以再合作,當佢哋知道今次再合作都好開心,最初睇頭10集,個個都以為我哋又分開,但係到結局見到我哋喺返埋一齊,覺得係了咗一個心結。」佢又話:「以前我哋都未有小朋友,甚至乎嘉欣都未拍拖同結婚,12年後再合作,大家成熟咗,好難得搵到一個自己鍾意嘅男人,結婚同生埋仔,我見到佢真係好開心,成個人都大個晒,接劇本之後都成日傾 加咗啲鍾嘉欣嘅嘢入去,而唔係好似以前,只係跟劇本去做。」

係咪因為呢行難得搵到另一半?林文龍話:「睇你點睇喇,好多嘢唔係o依家先出現,只係因為時代轉變,有啲報道嘅手法唔好而影響藝人,搞到有啲人覺得好辛苦,最後離開咗呢個圈,甚至離開埋香港,不過冇辦法,社會係咁,食得咸魚抵得渴呢句說話我唔覺係百分百啱,所有嘅嘢,應該係留番一份尊重。」

佢續話:「以前我係好憎啲狗仔隊,一見到佢哋就想開波,到今日已經係好妥協,其實佢哋都唔想30幾度喺條街影你,佢都係收公司order啫,都係返工賺錢去養妻活兒。當然,對方尊唔尊重返我,呢啲我冇得控制,已經睇得好化,做人要識得釋懷,淡然啲,人比人係比死人,知足者,貧亦樂。」

(蘋果日報)