【Keep得好好】患卵巢癌第4期上年結婚:發現好多失去嘅嘢都返晒嚟

    「其實都有啲似呢部戲,我同老公中間有28年係冇搵過對方,呢幾年先偶遇返,上年喺日本結咗婚。2015年3月,我知道自己有卵巢癌4期,呢個病生存率好低,幸好我可以好番,上年又結咗婚,真係好開心同幸福。」

    1986年,楊凡導演初執導筒拍攝電影《少女日記》,仲親自挑選鄧浩光同吳美枝擔任男女主角,又邀請林志美為電影獻唱主題曲《偶遇》。有趣嘅係,佢哋4個當時其實都係「初哥」,甚至幕後都有唔少新鮮人,幼嫩青澀嘅當時,湊起來卻是恰到好處嘅少女情懷。


    32年過去,早已各奔前程嘅四人,因為《少女日記》重聚,日前喺油麻地細談當日嘅電影初體驗。

    往事如歌,往事如詩。舊人聚首總係特別開心,楊凡、鄧浩光、吳美枝同林志美甫見面已經雞啄唔斷。問楊凡點解會揀《少女時代》重新修復上映?他笑稱:「我拍咗13部電影,全部我都修復晒,睇返啲毛片,真係好天真,啲技術真係好多進步空間。原本真係唔批修復呢部,因為都幾得人驚。」鄧浩光即笑謂:「我上星期入場睇返,啲人都投入到,仲好感動呀。」

    《少女日記》係楊凡首次執導嘅電影,故事係講鄧浩光同吳美枝一見鍾情,但卻因為種種原因而錯過結識對方,最後當然有個浪漫結局。楊凡稱:「成世我都想拍電影,嗰時徐克話畀我做導演,佢監製,原本我寫咗《上海之夜》但係拍唔到,跟住先有《少》,所以你會發現鍾鎮濤、葉蒨文嘅故仔,同鄧浩光、吳美枝係有啲相似,我對呢種好似好神秘嘅情愫,特別有感覺。」

    楊凡仲話當年揀角嘅時候,吳美枝係絕無他人之選:「嗰時佢拍過許冠傑MV,當年冇乜人拍MV 0架,好犀利,我一睇就知係佢。搵到女主角就搵男主角,鄧浩光嗰時仲喺銀禧中心教游水,我哋裝咗佢好耐。」鄧浩光直言拍戲嗰陣,覺得吳美枝唔靚:「嗰時唔識欣賞佢嘅靚,唔係我心目中嘅白雪公主。我都問自己,點解當時對佢會冇感覺架?好彩當時唔覺得佢靚,如果唔係Kevin(吳美枝丈夫)就冇機會啦。」

    吳美枝拍過電影《少》同《甜蜜十六歲》後便退居幕後,從事美容生意,多年來過得低調嘅佢,談到自己嘅近況:「其實都有啲似呢部戲,我同老公中間有28年係冇搵過對方,呢幾年先偶遇返,上年喺日本結咗婚。2015年3月,我知道自己有卵巢癌4期,呢個病生存率好低,幸好我可以好番,上年又結咗婚,真係好開心同幸福,所以呢部戲上番,我更加覺得得到大家好大嘅祝福。依家個人唔同咗,好多以前唔敢做嘅嘢,我都會嘗試去做,然後發現好多失去嘅嘢都返晒嚟。」

    楊凡補充說:「當日我朋友同佢喺同一間醫院做電療,但係我朋友走咗,依家見到佢抗癌成功,仲咁靚女,真係特別開心。」為重現電影中重要嘅一幕,吳美枝老公Kevin更大方客串,扮演陳俊國所演嘅角色,Kevin仲好鬼馬咁話:「陳俊國係我同學嚟0架,佢唔嚟,我幫佢頂住先。」

    《少》對吳美枝嚟講,好重要,佢話:「佢記錄晒我所有青春同天真,依家睇返,當日我做呢個決定好啱。雖然我好包包面,入面好多嫌棄,但好多謝當時嘅純真,拍到我嗰種靚。好記得最後嗰幕,我同鄧浩光回頭互望,嗰個畫面好經典,對於我嚟講係timeless,係代表咗我。」鄧浩光亦感謝楊凡同《少》,仲話楊凡改變咗佢一生:「如果嗰時唔係去咗拍戲,可能我會繼續教游水,然後平平凡凡咁過人生。呢部戲,所有人都係第一次,係有risk但係亦都有個好好嘅化學作用,真係想拍都拍唔返。」

    林志美指電影主題曲《偶遇》,為佢帶來好多:「佢畀我好多回憶,呢首歌亦係一個經典,去到邊都好,唔唱好似走唔到咁。」早前佢親自入戲院,一幕幕嘅畫面,配合佢自己嘅歌聲:「我冇帶任何期望入場,但原來會有人跟住唱,聽到呢個配樂,真係好感動。」鄧浩光仲帶咗個驚喜畀大家,係當年《少》嘅手抄絲印劇本:「真係好珍貴,入面仲有當年我哋影嘅相,呢個真係好經典,我之後拍20幾年戲,都冇再見過呢啲劇本。」

    (蘋果日報)

    SHARE