【大肚Coffee PO倒立相】網民鬧爆:有無諗過失手後果會係點

孕婦應否做太劇烈嘅運動,相信呢個課題都受到好多準媽媽嘅關注,昨日懷胎8月嘅Coffee(林芊妤)就喺ig度貼咗一張佢倒立嘅相,就引嚟好多網民嘅討論喇!

Coffee懷孕初期,身形上變化不大,令到好多孕媽媽嘅羨慕,佢仲不時喺社交網貼出做運動同玩瑜珈嘅相、短片,當時都有好多人提醒Coffee要小心,到今日佢貼咗做倒立嘅相,睇落又真係好驚險喎!有網民大讚Coffee犀利,亦羨慕佢大肚依然見到馬甲線等等。

但亦有網民質疑大肚可以做倒立咩?亦有網民話:「有無諗過失手後果會係點,為了影一張相值得咩」、「Will affect the baby positioning or not?」、「難到唔高,但肚入面d臍帶有機會因上下倒轉育動纏住bb喎。」更有網民覺得Coffee此舉乃為呃Like,引起網上一翻激烈爭辯。而亦有網民指有做瑜珈嘅人都知道這不是太高難度嘅動作,可能係華人嘅思想比較保守。

之前Coffee話過胎盤前置,可能要開刀生B,佢話:「醫生都話留喺香港休息吓好啲,不過佢話一定唔關我做運動事,可能我之前做過子宮手術。」

之後Coffee都留言更新回應:

「這是我懷孕前後
每天也會練習的瑜珈動作
而我做倒立的方法很安全
也有10年的倒立經驗
跟正常人站著一樣穩實
每個人的體質和準則也不一樣
所以將懷孕前運動量減半即可
加上我是瑜珈導師
知道有哪些動作孕婦要避免
激烈轉身向前彎向後彎
或訓練腹肌和壓到寶寶的動作
我在孕期也有避免的
而沒有練習過頭倒立的人
我相信也不會突然懷孕後去做
所以謝謝你們關心喔😘」

此外,今天29歲生日嘅Coffee,昨晚就約咗一班女性朋友慶祝,仲俾朋友好肉緊咁錫面,Coffee亦留言:「扁啦!」

(蘋果日報)