【真係差天共地…】楊怡升哂呢!

    楊怡昨日下晝,喺深水埗出席完宣傳活動後,就揸車返回大埔比華利山寓所,到大概5點鐘左右,佢同助手就揸住架Range Rover越野車到葵涌Land Rover車廠。紮住馬尾嘅楊怡同助手行咗落車,即刻已經有職員埋嚟招呼佢,楊怡交帶咗幾句後,就入咗辦公室簽文件,相信今次係送架車返去定期維修。

    楊怡前後逗留約30分鐘後就離開,而車廠方面仲搵專人揸架積架房車,送佢返回比華利山寓所,都咪話唔巴閉。而當楊怡知道有記者追訪時,佢仲調低車窗同記者講拜拜,非常友善。

    幾時都話「魚唔過塘唔肥」,就好似離開大台後嘅楊怡咁,早前返娘家拍劇,打咗折,每集身價都俾以前足足跳升五級,搵到錢咁梗係要買番架過百萬嘅車顯身價啦!

    睇返楊怡架Range Rover車價過百萬,加埋個靚牌就身價百倍。早排離巢嘅楊怡返娘家拍劇,自然收返正價片酬,打咗折都5萬蚊一集,三十六集計落成180萬,足夠買新車有餘,相對以前1萬蚊一集,真係差天共地,唔怪得之個個都出外搵食。

    (蘋果日報)

    SHARE