【圈中喜事連連】黃德斌口快快爆佢就快結婚!?

唔通下個到佢結婚?

 

今日喺尖沙嘴出席戶外用品品牌活動,大會安排教練教佢哋做熱身運動,又模擬行山甫士影相。

剛為人夫嘅黃德斌表現風騷,全程笑不攏咀,兩人受訪時,龔嘉欣就笑問記者:「覺唔覺佢婚後唔同咗?以前沉默寡言,依家活潑開朗又幽默。」黃德斌即笑謂:「都唔係今日(幽默)㗎啦,你少見我啫。」

問佢係咪因為可以同太太互叫老公老婆,感覺唔同所以特別開心?黃德斌忍不住話:「慣啦,咁多年。」

龔嘉欣又笑指佢係長輩,以為會派利是給自己,仲話:「嗰時《愛回家》你都做我阿哥啦,我睇住你大,睇住你成家立室。」黃德斌即反指:「聽聞你都快(結婚)啦,唔使怕醜喎。」龔嘉欣即打佢兼解釋話:「唔係呀,一陣又誤傳,我唔急㗎。」黃德斌仲要加多句:「阿邊個,佢話唔急喎,你聽唔聽到呀?」龔嘉欣又再解釋自己最近冇人追,而且太忙,日日都開緊劇。

講到日前超強颱風山竹令佢屋企水浸,幸得鄰居幫忙,隨即問到幫手嘅鄰居可有單身漢?龔嘉欣笑謂:「都係夫婦、婆婆,可能要等佢地啲孫啦。」但係佢又坦言,好多朋友都有努力撮合緊。

(蘋果日報)